Read Biblia SEPT Xeremías 16 Bible Online

Xeremías 16 - Biblia SEPT bible

Xeremías 16

¹Recibín a palabra do Señor, que me dixo:

²Non cases con muller deste lugar, nin teñas fillos nin fillas neste lugar,

³porque deste xeito lles fala o Señor ós fillos e fillas nados neste lugar, ás nais que os pariron, e ós pais que os xeraron neste país:

⁴Morrerán da morte máis adoecida, non serán chorados nin sepultados, quedarán de esterco na terra, perecerán a espada e de fame; os seus cadáveres servirán de comida ós paxaros do ceo e ós animais de debaixo da terra.

⁵O Señor fala deste xeito: —Non entres en casa onde se faga o banquete do enterro, nin vaias formar parte do dó, non lles deas o pésame, pois eu retiro deste pobo a miña paz —é o Señor quen fala—; retiro a miña fidelidade e misericordia.

⁶Morrerán grandes e pequenos neste país, non se enterrarán nin se fará dó por eles, non se farán incisións nin raparán o pelo por eles.

⁷Non haberá quen comparta con eles a tristeza, non haberá quen console por un morto, non haberá quen lles dea a beber a copa da consolación polo pai ou pola nai.

⁸Ti non entres na taberna para facelos deixar de comer e beber.

⁹Así fala o Señor omnipotente, o Deus de Israel: —Velaquí que eu estou facendo desaparecer deste lugar, ós vosos ollos e nos vosos días, o canto da alegría e as cantigas de ledicia, o canto do esposo e a voz da esposa.

¹⁰Cando lle anuncies a este pobo todos estes oráculos, hanche dicir: "Por que decretou o Señor contra nós toda esta enorme calamidade? Cal é a nosa culpa? Cal é o noso pecado, o que cometemos contra o Señor, o noso Deus?"

¹¹Ti responderaslles: "Porque vosos pais me abandonaron a min —é o Señor quen fala— para iren tras deuses alleos, dándolles culto e adorándoos; si, abandonáronme a min e non cumpriron a miña lei.

¹²E vós obrastes peor ca vosos pais, pois cada un de vós segue os apetitos do seu perverso corazón, sen me facer caso a min.

¹³Por isto heivos botar desta terra para outro país, que nin coñecedes vós nin vosos pais; alí adoraredes, día e noite, os deuses alleos, porque eu non vos concederei favor ningún".

¹⁴Certo, velaquí veñen os días —é o Señor quen fala— en que xa non se dirá: "Vive o Señor, que sacou os israelitas da terra de Exipto".

¹⁵Senón que se dirá: "Vive o Señor, que sacou os israelitas do país do norte, e de todas as terras a onde os dispersara". E fareinos volver á terra deles, á terra que lles dei a seus pais.

¹⁶Velaquí, eu mando moitos pescadores, para que os pesquen —é o Señor quen fala—; e despois mandarei moitos cazadores, para que os cacen por todos os montes e por todos os outeiros, e polas fendeduras das penas.

¹⁷Os meus ollos están sobre o seu comportamento, que non ten reparo da miña presenza, e a súa iniquidade non se agacha diante dos meus ollos.

¹⁸Saldarei por primeira e segunda vez a súa iniquidade e mais o seu pecado, porque profanaron a miña terra cos cadáveres das súas abominacións e coas súas execracións encheron a miña herdanza.

¹⁹Señor, ti es a miña forza e o meu refuxio, ti es o lugar seguro para os días de aflición. A ti virán os xentís, desde o cabo da terra e diranche: "Lerias son o que herdaron os nosos pais, deuses vans, que de nada lles servían".

²⁰Pode, acaso, o home facer para si os deuses? Pero estes non son deuses.

²¹Por isto, ollade o que eu lles mostro esta vez: eu móstrolles o meu poder e mais a miña forza, e saberán que o meu nome é "Iavé".