Read Biblia SEPT Xeremías 18 Bible Online

Xeremías 18 - Biblia SEPT bible

Xeremías 18

¹Esta é a orde que recibiu Xeremías da parte do Señor:

²Anda, baixa ó taller do oleiro, pois alí che comunicarei as miñas palabras.

³Eu baixei ó taller do oleiro e vin que estaba no torno co seu traballo.

⁴Cando ó oleiro lle saía mal o cacharro que estaba facendo, co barro que tiña na súa man transformábao noutro cacharro distinto, segundo lle parecía que o barro servía mellor.

⁵Veume de novo a palabra do Señor nestes termos:

⁶—Acaso non serei eu capaz de facervos a vós, casa de Israel, como fai este oleiro? —é o Señor quen fala—. Como está o barro na man do oleiro, así estades vós na miña man, casa de Israel.

⁷De pronto falo contra un pobo e contra un reino, de arrincalo, arrasalo e destruílo;

⁸pero, se este pobo contra quen eu falei se volve da súa iniquidade, eu arrepíntome do mal que pensei facerlle.

⁹E de repente fálolle ó pobo e ó reino de edificalo e plantalo.

¹⁰Pero se comete a iniquidade ós meus ollos, non facendo caso da miña chamada, entón arrepíntome do ben con que falei de o favorecer.

¹¹E agora fálolles ós xudeus e ós veciños de Xerusalén: Así fala o Señor: —Ollade, eu son o oleiro e estou dándolle forma a un desastre contra vós, estou maquinando algo contra vós. Volvédevos, por favor, cada un do seu camiño de maldade, mellorade o voso comportamento e as vosas obras.

¹²Pero eles din: —Fóra! Seguiremos as nosas ideas, cada un de nós obrará conforme o seu corazón obstinado na maldade.

¹³Por iso, así fala o Señor: —Preguntádelles ós pagáns: quen oíu tales cousas coma estas? Sen vergoña se espiu a virxe de Israel.

¹⁴Deixa o Poderoso de ser Rocha? Deixa a neve o Líbano? Minguan as augas alleas? Minguan as fontes que corren?

¹⁵Como se esquece de min o meu pobo, como ofrece incenso a Nada, como tropeza nos seus camiños, para camiñar por corredoiras, por carreiros sen construír,

¹⁶convertendo así a súa terra nunha desolación, nun noxo para sempre! Todo o que a atravese quedará pasmado, daralle á cabeza para un lado e para outro.

¹⁷Coma cun aire soán heinos esparexer na presenza dos inimigos; vereilles as costas, non a cara, o día da súa desgraza.

¹⁸Eles dixeron: —Ollade, tramemos plans contra Xeremías, pois a Lei non lle faltará ó sacerdote, nin o consello lle faltará ó sabio, nin a palabra ó profeta; vinde, castiguémolo pola súa lingua, e non fagamos caso das súas verbas.

¹⁹—Aténdeme, Señor, escoita a voz dos meus inimigos.

²⁰Págase, acaso, mal por ben? Velaquí que cavaron para min un pozo. Lémbrate de que estiven ante ti, para falar ben a favor deles, para apartar deles o teu noxo.

²¹Por iso, entrega os seus fillos á fame, fainos desangrar coa forza da espada; queden as súas mulleres sen fillos e viúvas, sexan os seus homes mortos pola peste, os seus mozos feridos con espada na guerra.

²²Que se oian saír das súas casas os berros, cando de repente traias contra eles bandas de asasinos, porque cavaron un pozo para collerme e esconderon alí trampas para os meus pés.

²³Pero ti, Señor, coñeces ben todos os seus plans de morte contra min: non lles perdoes a súa iniquidade; o seu pecado non o borres da túa presenza. Sexan eles quen tropecen e caian ante ti; na hora da túa ira actúa contra eles.