Read Biblia SEPT Xeremías 33 Bible Online

Xeremías 33 - Biblia SEPT bible

Xeremías 33

¹A palabra do Señor veulle de segundas a Xeremías nestes termos, mentres continuaba aínda preso no patio da garda.

²Así fala o Señor, que o fará; o Señor, que lle dará forma; o Señor daralle o ser; o seu nome é Iavé:

³Chámame e respondereiche, e mostrareiche cousas grandes e inaccesibles: ti non as coñeces.

⁴Así fala o Señor, Deus de Israel, acerca das casas desta cidade e dos palacios dos reis de Xudá que están para ser arrasados. A forza das ramplas de asedio e a forza da espada

⁵veñen loitar xunto cos caldeos: encheranos a eles de cadáveres de homes que eu ferín coa miña ira e co meu furor, xa que lle escondín a miña cara a esta cidade por toda a súa maldade.

⁶Pero velaquí que eu lle poñerei á cidade remedios e curas, e curareina; descubrireilles as riquezas da paz e da fidelidade.

⁷Farei volver os cativos de Xudá e os cativos de Israel, e restablecereinos coma no principio.

⁸Purificareinos de toda a súa iniquidade, coa que pecaron contra min; perdoarei todas as iniquidades coas que pecaron contra min e coas que se rebelaron contra min.

⁹Isto será para min un alegre renome, un motivo de loanza e de gloria ante todos os pobos da terra, que oian todo o ben que eu lles fixen a Xudá e a Israel; os pobos saltarán e brincarán de ledicia por todo o ben e toda a paz que eu lles fixen.

¹⁰Así fala o Señor: neste lugar que vós vedes que está devastado por falta de homes e por falta de animais; nas cidades de Xudá e nas rúas de Xerusalén, desoladas por falta de homes, por falta de habitantes e por falta de animais, aínda se volverán oír

¹¹berros de alegría e voces de gozo, o cantar do esposo e a cántiga da esposa, e a salmodia dos que, ó presentaren o sacrificio de acción de grazas no templo do Señor, dirán: "Loade o Señor dos Exércitos Que bo é o Señor! Eterna é a súa fidelidade!". Si, eu farei volver os cativos desta nación coma nun principio —dío o Señor—.

¹²Así fala o Señor dos Exércitos: neste país desolado por falta de homes e por falta de animais, e en todas as súas cidades, aínda volverá haber pasteiros de pastores que fagan descansar os seus rabaños.

¹³Nas cidades da montaña, nas cidades da Xefelah, nas cidades de Négueb, na rexión de Benxamín, nos arredores de Xerusalén e nas cidades de Xudá, aínda volverán pasar as reses ante as mans do que as conta —di o Señor—.

¹⁴Velaquí os días —é o Señor quen fala— nos que cumprirei a promesa que lles fixen á casa de Israel e á casa de Xudá.

¹⁵Nos días aqueles e no intre aquel farei abrollar de David un xermolo lexítimo, que practicará o dereito e a xustiza no país.

¹⁶Nos días aqueles salvarase Xudá, e Xerusalén descansará na seguridade, e este lugar chamarase: "Iavé, nosa xustiza!".

¹⁷Certo, así fala o Señor: non será privado David dun que sente no trono da casa de Israel,

¹⁸nin ós sacerdotes levíticos os privarán de que me sirvan na miña presenza ofrecendo holocaustos, queimando ofrendas e celebrando o sacrificio de todos os días.

¹⁹Veulle a palabra de Deus a Xeremías nestes termos:

²⁰Así fala o Señor: —Cando quebrantan a miña alianza de día e cando a quebrantan de noite, o meu corazón estarrece día e noite polo seu matinar;

²¹de certo que rompe o meu pacto co meu servo David, que non lle faltaría un fillo que fose rei no seu trono, e rompe o meu pacto cos sacerdotes levíticos, meus servidores.

²²Pero o mesmo que non se contan as estrelas do ceo, nin se dá medido a area do mar, así hei de multiplicar a descendencia de David, o meu servo, e a dos levitas que me serven a min.

²³Logo veulle a palabra do Señor a Xeremías nestes termos:

²⁴—Acaso non viches o que este pobo di? "As dúas familias que o Señor escollera, rexeitounas". Así rexeitan o meu pobo e non o consideran pobo ante eles.

²⁵Así fala o Señor: Tan certo como cumpro a miña alianza co día e coa noite, e teño establecidas as leis do ceo e da terra,

²⁶Así non rexeito a descendencia de Xacob e de David, o meu servidor, nin deixarei de coller dela os xefes para a descendencia de Abraham, Isaac e Xacob. Certo, eu rescatarei a súa catividade e compadecereime desta descendencia.