Read Biblia SEPT Baruc 5 Bible Online

Baruc 5 - Biblia SEPT bible

Baruc 5

¹Xerusalén, quita o vestido da túa dor e da túa desgraza, e viste para sempre o esplendor da gloria que vén de Deus.

²Envólvete no manto glorioso da xustiza que vén de Deus: pon na túa cabeza a diadema da gloria do Eterno.

³Deus vai mostrar o teu esplendor a toda cidade baixo o ceo,

⁴pois Deus fará que o teu nome sexa para sempre "paz da Xustiza e Gloria da Piedade diante de Deus".

⁵Ponte de pé, Xerusalén, ponte de pé no alto, e mira cara ó nacente, olla ós teus fillos reunidos pola palabra do Santo, alegres pola lembranza do Señor desde o poñente ata o nacente.

⁶Saíron de onda ti, levados a pé polos inimigos, pero Deus devólvechos en andas de gloria, coma un trono de realeza.

⁷Pois mandou o Señor que se rebaixasen os montes altos e os vellos outeiros e que os barrancos se enchesen volvéndose chairas, para que Israel camiñe con paso seguro, guiado pola gloria de Deus;

⁸e por orde de Deus as árbores do bosque e as plantas recendentes déronlle sombra a Israel.

⁹Si, Deus conducirá a Israel con alegría á luz da súa gloria, coa misericordia e a xustiza que están con El.