Read Biblia SEPT Ezequiel 19 Bible Online

Ezequiel 19 - Biblia SEPT bible

Ezequiel 19

¹Ti entoa unha elexía polos príncipes de Israel,

²dilles: Que leoa foi a túa nai no medio de leóns! Tombada no medio dos leóns, criaba a súa camada.

³Criou un dos seus cachorros, que se volveu un leonciño, aprendeu a esnaquizar a presa, devorou homes.

⁴Souberon del as nacións: cazárono nas súas foxas e levárono con ganchos ó país de Exipto.

⁵Ela, ó ver que a súa esperanza e a súa ilusión estaban perdidas, colleu outro dos seus cachorros e constituíno nun leonciño.

⁶El daba voltas entre os leóns, feito un novato león;

⁷Aprendía a esnaquizar a presa, devoraba homes; abusaba das súas viúvas e desolaba as súas vilas; o país e os seus habitantes estaban amedrentados polo ruído dos seus ruxidos.

⁸Pero os países de toda a volta viñeron contra el, desde as provincias estenderon sobre el as súas redes e atrapárono nas súas foxas.

⁹Metérono con ganchos na gaiola para o levaren xunto ó rei de Babilonia; levárono a Babilonia, para que non se volva a oír a súa voz nos montes de Israel.

¹⁰Túa nai era semellante a unha vide da túa caste plantada xunto á auga: daba froito e estaba chea de ramas por mor da abundante auga.

¹¹Daba bacelos de tal poder que servían para cetros de reis; a súa altura sobresae por entre as nubes; é impoñente pola súa altura e pola multitude das súas ramas.

¹²Foi arrincada con carraxe e foi tirada por terra, o vento do nacente secou o seu froito que se desprendeu; e secou as súas ramas poderosas e o lume consumiunas.

¹³E agora está plantada no deserto, en terra reseca e sedenta.

¹⁴Saíu lume dunha das ramas e consumiu os bacelos e os seus froitos. Xa non hai nela ramas poderosas, báculos para reinar. Esta é unha elexía, e cántase coma unha elexía.