Read Biblia SEPT Ezequiel 25 Bible Online

Ezequiel 25 - Biblia SEPT bible

Ezequiel 25

¹Veume a palabra do Señor nestes termos:

²Fillo de Adam, ponte cara ós amonitas e profetiza contra eles,

³dilles ós fillos de Amón: Escoitade a palabra do meu Señor Iavé: —Por dicirdes contra o meu santuario: "Ei, que sexa profanado!" E contra a terra de Israel: "Que vaian á catividade!",

⁴por isto velaquí que eu te entrego en herdanza ós fillos do Nacente, que asentarán en ti as súas cercas de pedra, e chantarán en ti os seus campamentos; eles comerán os teus froitos, e beberán o teu leite;

⁵converterei a Rabah nun pasteiro de camelos e as construcións de Amón nun curral de ovellas. Deste xeito recoñeceredes que eu son o Señor.

⁶Así fala o meu Señor, Iavé: —Por bateres palmas e pateares cos pés, e por te alegrares con todo o teu desprezo polas terras de Israel,

⁷por isto estendo a miña man contra ti: entregareite en botín ás nacións e exterminareite de entre os pobos; fareite desaparecer de entre os países e devastareite. Deste xeito recoñecerás que eu son o Señor. Contra Moab

⁸Así fala o meu Señor, Iavé: —Por dicirdes, Moab e Seir: "Velaí a Casa de Xudá, é igual ca todas as nacións",

⁹por isto, fíxate: vou abrir un costado a Moab, por falar burlescamente; de entre as súas cidades quitareille a xoia do país, o Casal da Desolación, o Casal de Baal, Meón e Quiriataim:

¹⁰entregareina ós fillos do Nacente en herdanza ante os fillos de Amón, para que nunca máis sexan lembrados os fillos de Amón entre os pobos.

¹¹Farei xustiza en Moab. Entón recoñecerán que eu son o Señor.

¹²Así fala o meu Señor, Iavé: —Por mor do comportamento de Edom ó practicar a vinganza contra a Casa de Israel, e se facer culpable da súa vinganza contra ela,

¹³por isto así fala o meu Señor, Iavé: —Estendo o meu brazo contra Edom: exterminarei del homes e animais, convertereino nunha desolación, desde Temán ata Dedán caerán á espada.

¹⁴Descargarei a miña vinganza contra Edom pola man do meu pobo Israel, que tratará a Edom conforme o meu xenio e a miña ira. Entón coñecerán a miña vinganza —é o meu Señor, Iavé, quen fala—.

¹⁵Así fala o meu Señor, Iavé: —Por obraren os filisteos a traizón e por se vingaren con profundo desprezo persoal dunha morte que trouxo odio secular,

¹⁶por isto así fala o meu Señor, Iavé: —Vede que vou estender a miña man contra os filisteos, vou exterminar os quereteos, vou arruinar os que queden da beira do mar.

¹⁷Vou facer neles unha terrible vinganza, con castigos desapiadados. Entón, cando eu me vingue deles, recoñecerán que eu son o Señor.