Read Biblia SEPT Ezequiel 27 Bible Online

Ezequiel 27 - Biblia SEPT bible

Ezequiel 27

¹Veume a palabra do Señor nestes termos:

²Oe ti, fillo de Adam, entoa sobre Tiro unha elexía:

³Tiro, a ti que sentas rexiamente á entrada do mar, que a moitas costas vas traficando cos pobos, así fala o meu Señor, Iavé: —Tiro, ti pareces un barco de acabada fermosura,

⁴os teus lindeiros están no corazón do mar, os que te construíron consumaron a túa fermosura;

⁵de cipreses de Senir fixéronche todo o teu casco, colleron un cedro do Líbano para facer o mastro para ti;

⁶con carballos de Baxán fixeron os teus remos, fixeron os bancos de almafí; os cuartos, de cedro traído das costas de Chipre;

⁷de liño curado de Exipto con bordados era a tea que che servía de vela; de púrpura azul e de púrpura vermella das costas de Elixah era o teu toldo.

⁸Príncipes de Sidón e de Arvad eran os teus remeiros, sabios de Tiro estaban en ti: eran os teus mariñeiros.

⁹Expertos de Biblos e os seus sabios estaban en ti tapando as túas fendas; todos os barcos do mar e mais os seus mariñeiros aparecen en ti para facer comercio coa túa carga;

¹⁰persas, lidios e mais libios estaban no teu exército, eran os teus homes de guerra; escudos e helmos colgaban en ti, dábanche esplendor.

¹¹Os de Arvad eran o teu exército, dos teus muros todo ó arredor, e os gamaditas estaban nas túas fortalezas; colgaban os seus escudos nos teus muros todo ó arredor, e consumaban a túa fermosura.

¹²Tárxix era o teu arrieiro pola abundancia da túa riqueza; por prata, bronce, estaño e chumbo cambiaban a túa mercadoría.

¹³Iaván, Tubal e mais Méxec eran os teus mercadores, por escravos e útiles de bronce cambiaban a túa mercadoría.

¹⁴Os do estado de Togarmah cambiábanche a túa mercadoría por cabalos, corceis e mais mulos.

¹⁵Os homes de Rodas eran os teus traficantes; os de moitas costas eran comerciantes intermediarios teus, dábanche en paga dentes de almafí e mais madeira de ébano.

¹⁶Aram era o teu mercador pola abundancia da túa produción; por granate, púrpura, fío, corais e rubís cambiaban parte da túa mercadoría.

¹⁷Xudá e o país de Israel eran os traficantes; por trigo de Minit e por bicas doces, mel, aceite e bálsamo cambiaban as túas mercadorías.

¹⁸Damasco era quen traficaba, coa abundancia dos teus produtos, coa abundancia das túas riquezas, polo viño de Helbón, pola lá de Sahar,

¹⁹e polas xerras de viño de Izal cambiaban parte da túa mercadoría; ferro forxado, canela e canivela aromática eran parte das túas mercadorías.

²⁰Dedán era o teu mercador en mantas de montar a cabalo.

²¹Arabia e os príncipes de Quedar eran traficantes dos teus haberes en años, carneiros e castróns; eran os teus traficantes nestas mercadorías.

²²Os traficantes de Sabá e de Ramah eran os que traficaban contigo; polo mellor de todas as especias, pedras preciosas e ouro cambiaban as túas mercadorías.

²³Harán, Caneh e Edén eran os que traficaban con Sabá, Asur e Kilmad a túa mercadoría;

²⁴estes eran os teus traficantes en vestidos elegantes, en mantos de púrpura e bordados, en alfombras de lá de varias cores, en cordas ben torcidas e fortes; eran os teus traficantes nestas mercadorías.

²⁵Os barcos de Tárxix eran os que che transportaban a túa mercancía; enchícheste e pesabas moito no corazón do mar;

²⁶os que te traían a maltraer, leváronte a alta mar, e o vento do leste esnaquizoute no corazón do mar.

²⁷As túas riquezas, as túas mercadorías e o teu comercio, os teus mariñeiros e os teus homes do mar, os que tapan as túas gretas e os que trafican coa túa mercadoría, todos os teus homes de guerra que había en ti, e toda a túa tripulación que está dentro de ti caerán ó corazón do mar no intre da túa caída.

²⁸O grito de auxilio da túa tripulación estremecerá o espazo remoto:

²⁹entón todos os que empuñan o remo baixarán dos seus barcos, mariñeiros e todas as tripulacións do mar quedarán en terra.

³⁰Levantarán a súa voz e berrarán amargamente por ti, botarán po nas súas cabezas e envorcallaranse na cinsa.

³¹Raparán a súa cabeza por ti, e vestiranse de saco. Chorarán por ti con amargura persoal, con lamentos amargos.

³²E no seu dó entoarán por ti unha elexía, cantarán por ti esta elexía: "Quen foi coma Tiro, coma a Fortaleza no medio do mar?".

³³Coa exportación das túas mercadorías polo mar fartabas os pobos das túas riquezas; coa abundancia dos teus bens e das túas mercadorías enriquecías os reis do mundo.

³⁴Agora ti estás desfeita polo mar, estás nos profundos do mar; as túas mercadorías e a túa tripulación naufragaron.

³⁵Todos os habitantes das costas están estarrecidos por causa túa, e os seus reis están horrorizados, conmóveselles a faciana.

³⁶Os traficantes entre as nacións asubían por ti: volvícheste algo horrible, deixaches de existir para sempre!