Read Biblia SEPT Ezequiel 28 Bible Online

Ezequiel 28 - Biblia SEPT bible

Ezequiel 28

¹Veume a palabra do Señor nestes termos:

²Fillo de Adam, dille ó príncipe de Tiro: Así fala o meu Señor, Iavé: Dado que se ensoberbeceu o teu corazón e pensaches: "Son un deus, estou sentado nun trono de deuses no corazón do mar", sendo ti un home, non un deus; aínda que ti pensaches que tiñas unha sabedoría coma a dos deuses.

³Seica ti es máis sabio ca Daniel e ningún misterio se che resiste!

⁴Coa túa habilidade e coa túa agudeza conseguiches ouro e prata entre os teus tesouros.

⁵Con aguda habilidade nos teus tratos aumentaches a túa fortuna, e coa riqueza o teu corazón volveuse orgulloso.

⁶Por isto así fala o meu Señor, Iavé: —Porque consideraches a túa sabedoría coma a sabedoría dun deus,

⁷por isto, velaí que eu vou traer contra ti os bárbaros, os máis tiranos dos pobos; desenfundarán as súas espadas contra a túa preciosa sabedoría e acoitelarán o teu esplendor.

⁸Farante baixar ó Abismo, e no corazón do mar morrerás coa morte do acoitelado.

⁹Aínda te atreverás a dicir: "Eu son un deus" na presenza dos que te van matar? Pois ti es un home, non un deus, nas mans dos que te van acoitelar.

¹⁰Nas mans dos bárbaros morrerás coa morte dos castrados, pois eu son quen falei, —oráculo do Señor—.

¹¹Veume a palabra do Señor nestes termos:

¹²—Fillo de Adam, entoa unha elexía sobre o rei de Tiro: Así fala o meu Señor, Iavé: —Ti es a serpente da perfección, cheo de sabedoría, e perfecto en fermosura;

¹³ti vives no Edén, o xardín de Deus, toda sorte de pedras preciosas son o teu valo: cornalina, topacio, augamariña, crisólito, berilo e ónix; zafiro, rubí e esmeralda, e o ouro que hai en ti é por causa da túa fermosura, e do teu esplendor; foi preparado para ti o día que fuches creado.

¹⁴Ti eras un querubín coas ás estendidas, púxente de gardián, estabas no monte santo dos deuses, e movíaste por entre carbóns ardendo.

¹⁵Ti eras perfecto polo teu comportamento, desde o día en que fuches creado ata o día no que se atopou en ti a iniquidade.

¹⁶Coa abundancia do teu comercio íaste enchendo por dentro de violencia e pecados, por isto eu destituínte da categoría sacra, lonxe da montaña de Deus, e elimineite a ti, querubín protector, de entre os carbóns acendidos.

¹⁷O teu corazón ensoberbeceuse por mor da túa fermosura, e ti destruíches a sabedoría a causa do teu esplendor; eu boteite no Xeol e púxente diante dos reis para que te contemplasen.

¹⁸Coa multitude das túas iniquidades e a inxustiza do teu comercio profanaches o teu santuario; por isto farei saír lume do medio de ti, que te devorará, e convertereite en cinsa, sobre a terra, na presenza de todos os que miren.

¹⁹Todos os teus amigos entre as nacións estarán horrorizados por causa túa; ti serás algo horrible, e nunca máis volverás existir.

²⁰Veume a palabra do Señor nestes termos:

²¹—Fillo de Adam, dirixe a túa ollada cara a Sidón e profetiza contra ela:

²²Así fala o meu Señor, Iavé: —Velaquí, eu estou contra ti, Sidón, e vou ser glorificado dentro de ti. Entón recoñecerán que eu son o Señor, cando execute nela a sentencia e mostre nela a miña santidade.

²³Mandarei contra ela a peste e o sangue ás súas rúas; caerá o asasino sobre ela, coa espada subirá a Sidón de todo o arredor. Entón recoñecerán que eu son o Señor.

²⁴E xa non volverá haber para os da Casa de Israel espiño que se crava nin aguillón que fura de parte de todos os veciños que os desprezan. Entón recoñecerán que eu son o Señor, Deus.

²⁵Así fala o meu Señor, Iavé: —Cando eu reúna a Casa de Israel de entre os pobos onde están esparexidos, mostrarei a miña santidade neles á vista de todos os pobos e asentarán na terra que eu lle dei ó meu servo, Xacob.

²⁶Asentarán nela con tranquilidade, construirán casas e plantarán viñas e vivirán na tranquilidade, cando eu execute as sentencias contra todos os que ó seu arredor os desprezan. Entón recoñecerán que eu son o Señor, o seu Deus.