Read Biblia SEPT Ezequiel 29 Bible Online

Ezequiel 29 - Biblia SEPT bible

Ezequiel 29

¹O ano dez, o día doce do mes décimo, veume a palabra do Señor nestes termos:

²Fillo de Adam, dirixe a túa ollada cara ó Faraón, rei de Exipto, e profetiza contra el e contra todo o Exipto.

³Fala e dille: Así fala o meu Señor, Iavé: —Velaí, eu estou contra ti, Faraón, rei de Exipto, grande monstro, deitado entre as canles do Nilo, que di: "De min sae o meu Nilo, e eu prodúzoo para min".

⁴Poñerei dous ganchos nas túas queixadas, e apegarei os peixes do Nilo ás túas escamas; farei que subas do medio do Nilo, e leves pegados todos os peixes do Nilo nas túas escamas.

⁵Arrastrareite ó deserto a ti e a todos os peixes do Nilo; morrerás sobre a superficie do campo, sen que te recollan nin te enterren. Poñereite de pasto para os bechos de debaixo da terra e para os paxaros do ceo;

⁶entón todos os habitantes de Exipto recoñecerán que eu son o Señor. Por seren eles un bastón de canivela, para a Casa de Israel,

⁷cando ti os apertes coa túa man, sentiraste débil pero romperás ante eles todo apoio; cando eles se apoien en ti, romperaste, pero farás que todas as túas forzas se restablezan para o ben deles.

⁸Por isto así fala o meu Señor, Iavé: —Velaí, vou traer a espada contra ti e exterminar de ti homes e animais,

⁹e o país de Exipto volverase desolación e ruína. Entón recoñeceredes que eu son o Señor. Por dicires: "O Nilo sae de min, eu son quen o fixen",

¹⁰por isto, velaí, eu estou contra ti e contra o teu Nilo; eu vou converter o país de Exipto en ruínas, nunha ruína desértica desde a Torre das Caravanas ata a fronteira de Etiopía.

¹¹Non o atravesará pé de home nin casco de animal o cruzará; nin será habitado durante corenta anos.

¹²Converterei o país de Exipto nunha desolación maior cós países que están desolados: as súas cidades que foron arruinadas, durante corenta anos. Esparexerei a Exipto entre os pobos e espallareino entre os países.

¹³Velaí o que di o meu Señor, Iavé: —O cabo de corenta anos reunirei a Exipto de entre os pobos a onde foi esparexido;

¹⁴deste xeito cambiarei a sorte da catividade de Exipto e fareinos volver ó país do Sur, a súa terra de orixe, e formarán alí un reino humilde,

¹⁵que será máis humilde cós outros reinos; e non se volverá levantar contra os outros pobos, fareino miúdo para que non oprima ós demais pobos.

¹⁶Exipto nunca máis será para a Casa de Israel a seguridade, que fai lembrar a iniquidade de cando Israel se volvía tras el, senón que a Casa de Israel recoñecerá que eu son o Señor, Iavé.

¹⁷O ano vinte e sete, o un do primeiro mes, veume a palabra do Señor nestes termos:

¹⁸Fillo de Adam: Nabucodonosor, rei de Babilonia, fixo traballar ó seu exército en dura campaña contra Tiro; todas as cabezas quedaron peladas, e todos os ombreiros quedaron sen pel; pero nin el nin o seu exército sacarán proveito de Tiro, a pesar da campaña que contra el fixeron.

¹⁹Por isto, así fala o meu Señor, Iavé: —Velaí, voulle entregar o país de Exipto a Nabucodonosor, rei de Babilonia, que collerá os tesouros de Exipto, roubará as súas ganancias e arrebatará o seu botín, e así terá salario para o seu exército.

²⁰En paga da esforzada campaña que fixeron contra Tiro, eu entregareilles o país de Exipto, pois fixérono por min, —é o meu Señor, Iavé, quen o di—.

²¹O día aquel medrará a puxanza da Casa de Israel, e a ti concedereiche o poder abrir a boca no medio deles. Entón recoñecerán que eu son o Señor.