Read Biblia SEPT Ezequiel 31 Bible Online

Ezequiel 31 - Biblia SEPT bible

Ezequiel 31

¹O ano once, o primeiro día do mes terceiro, veume a palabra do Señor nestes termos:

²Fillo de Adam, dilles ó Faraón, rei de Exipto, e á súa tropa: A quen te pareces na túa grandeza?

³Velaí unha exuberante ramaxe, ramallada sombriza, impoñente altura, as súas pólas están entre as nubes.

⁴As augas da chuvia fano medrar, e as augas de baixo terra fano crecer, a súa raizame camiña por todo o arredor cara ás correntes de baixo terra, que manda os seus regos onda todas as árbores do campo.

⁵Por isto a súa altura supera a todas as árbores do campo, as súas pólas multiplicáronse, o seu talo ensanchou, ó lanzarse el onda as augas abundantes.

⁶Nas súas pólas aniñaban todos os paxariños do ceo, debaixo da súa ramallada parían todos os animais do campo, e á súa sombra descansaban todos os pobos ricos.

⁷Que fermoso era coa súa grandura e coa anchura da súa ramaxe! Como alongaba as súas raíces cara ás augas abundantes!

⁸No xardín dos deuses os cedros non eran máis altos ca el, nin os cipreses se podían comparar á súa ramaxe, nin os plátanos eran coma as súas ramas; ningunha árbore do xardín dos deuses se podía comparar con el na súa beleza.

⁹Espléndido o fixen, coa abundancia da súa ramaxe, Como lle tiñan envexa todas as árbores do Edén, que está no xardín dos deuses!

¹⁰Pois ben, así fala o meu Señor, Iavé: —Por ensoberbecerse da altura, e por poñer a súa ramaxe entre as nubes, e por oufanarse os seus pensamentos coa altura,

¹¹eu entregueino ó poder do xefe das nacións, que o ha tratar conforme á súa maldade,

¹²Deixeino para que o corten os bárbaros, os máis tiranos de entre os pobos, e o abandonen no monte, e as súas pólas caian por todos os barrancos, e a súa ramaxe sexa esnaquizada polos máis valentes do mundo, e todos os poderosos do mundo saian da súa sombra e o rexeiten.

¹³Nas súas pólas caídas pousáronse todos os paxariños do ceo e todos os animais do campo estiveron na súa ramaxe.

¹⁴Deste xeito ningunha árbore ben regada se oufanará coa altura, nin poñerá a súa ramaxe entre as nubes, nin ningunha árbore ben regada se manterá firme na súa soberbia fronte ás outras, pois todas elas están destinadas á morte, ás profundidades da terra, a estaren cos fillos de Adam, cos que baixan ó abismo.

¹⁵Así fala o meu Señor, Iavé: —O día que o cedro baixou ó reino dos mortos, eu fixen que o Abismo fixese loito por el, e que o cubrise: parei a súa corrente e detivéronse as augas caudalosas. Fixen que o Líbano se puxese de loito por el, e cubríronse de loito por el todas as árbores do campo.

¹⁶Fixen que co estrondo da súa caída se estremecesen as nacións, cando o fixen baixar ó reino dos mortos cos que baixaban ó Abismo; consoláronse nas profundidades da terra todas as árbores do Edén, e o escollido e o mellor do Líbano, todas as árbores ben regadas de auga.

¹⁷Pois tamén baixaron elas xunto co cedro ó reino dos mortos, o exército dos atravesados pola espada e os xermolos do cedro, que vivían á súa sombra no medio das nacións.

¹⁸E, así, a quen te parecías en gloria e grandeza entre as árbores do Edén? Farante baixar xunto coas árbores do Edén ás profundidades da terra, e deitaraste no medio dos incircuncisos, xunto cos pasados pola espada. Tal será o Faraón e todo o seu exército —é o meu Señor, Iavé, quen fala—.