Read Biblia SEPT Ezequiel 39 Bible Online

Ezequiel 39 - Biblia SEPT bible

Ezequiel 39

¹Oe ti, fillo de Adam, profetiza contra Gog e di: Así fala o meu Señor, Iavé: Velaí, eu estou contra ti, Gog, grande príncipe de Méxec e de Tubal,

²vou conducirte fóra e facerte saír, fareite subir desde o remoto norte, e levareite ós montes de Israel.

³A golpes farei que soltes o arco da túa man esquerda, e farei caer as frechas da túa man dereita.

⁴Nos montes de Israel caerás ti e todas as túas tropas, e os exércitos que estarán contigo. Entregareite en pasto ás aves de rapina, ós paxariños, ós paxaros de toda clase e ós animais salvaxes.

⁵Caerás no campo raso, pois eu son quen o dixen —oráculo do meu Señor, Iavé—.

⁶Mandarei lume contra Magog e contra os que viven nas illas con tranquilidade. Entón recoñecerán que eu son o Señor.

⁷Darei a coñecer o meu santo Nome entre o meu pobo Israel, e non deixarei que volvan profanar o meu santo Nome. Recoñecerán as nacións que eu son Iavé, o Santo de Israel.

⁸Velaí que isto chega, que acontece —oráculo do meu Señor, Iavé—: é o día do que falei.

⁹Entón os que viven nas cidades de Israel sairán e prenderán lume e queimarán as armas: rodelas e escudos, arcos e frechas grandes, mazas e lanzas. Con isto terán para facer lume durante sete anos.

¹⁰Xa non levarán dos montes a madeira, nin cortarán leña para a traer desde a touza, senón que coas armas farán lume. Saquearán ós seus saqueadores, e roubarán ós seus ladróns —é o meu Señor, Iavé, quen fala—.

¹¹Sucederá no día aquel que eu lle darei a Gog sepultura alí, unha tumba en Israel, no Val dos Camiñantes, ó nacente do mar Morto, o val que lles cerra o camiño ós camiñantes. Alí enterrarán a Gog e a toda a súa tropa, por isto lle chamarán o val das tropas de Gog.

¹²A Casa de Israel enterraraos para facer a purificación do país en sete meses.

¹³Enterraraos toda a xente do país, e o día no que eu me cubra de gloria seralles memorable —é o meu Señor, Iavé, quen fala—.

¹⁴Os membros da confraría dos medidores da terra escollerán ós que percorran o país, para enterraren —eles que percorren o país— ós que queden sobre a superficie da terra, e deste xeito a limpen. O cabo de sete meses empezarán a inspección.

¹⁵Os corredores percorrerán o país, e quen ollar uns ósos humanos, poralles ó lado, de sinal, unha pedra dereita. De tanto enterraren ósos os sepultureiros no val das tropas de Gog,

¹⁶empequenecerá a cidade coas sepulturas da tropa, pero limparán o país.

¹⁷—Oe ti, fillo de Adam: Así fala o meu Señor, Iavé: —Dilles ós paxariños de toda clase de pluma, e a todos os animais do campo: —Xuntádevos, vinde, reunídevos de todo o arredor para a matanza coa que vos vou convidar, unha grande matanza nos montes de Israel. Comeredes carne e beberedes sangue.

¹⁸Comeredes a carne dos heroes, e beberedes o sangue dos príncipes da terra; todos eles serán os carneiros, os años, os castróns, os xatos e os becerros de Baxán.

¹⁹Comeredes graxa ata fartarvos e beberedes sangue ata emborracharvos: tal será o banquete que vos teño preparado.

²⁰Na miña mesa fartarédesvos de cabalos e de cabaleiros, de heroes e de todos cantos interveñen na guerra —é o meu Señor, Iavé, quen fala—.

²¹Porei a miña gloria no medio das nacións e todas as nacións verán a sentencia que eu executarei e a miña man, que eu porei sobre eles.

²²Desde o día aquel e de alí para adiante recoñecerá a Casa de Israel que eu son o Señor, o seu Deus.

²³E as nacións recoñecerán que a Casa de Israel marchou ó desterro pola súa culpa, porque se rebelaron contra min, e entón eu escondinlles a miña cara, e entregueinos na man dos seus inimigos: todos eles caeron pola espada.

²⁴Trateinos de acordo coas súas porcalladas, e conforme as súas rebeldías, e escondinlles a miña cara.

²⁵Pero, fixádevos, así fala o Señor: —Agora eu fago volver os desterrados de Xacob e compadézome de toda a Casa de Israel, pois sinto celos polo meu santo Nome.

²⁶Esquecerán a súa vergonza e a súa rebeldía coa que se rebelaron contra min, cando vivan na súa terra con tranquilidade e sen haber quen os atemorice.

²⁷Cando os faga volver de entre os pobos e os reúna traéndoos dos países dos seus inimigos, mostrarei a miña santidade neles, na presenza doutros pobos grandes e numerosos.

²⁸E recoñecerán que eu son o Señor, o seu Deus, pois, aínda que os levei deportados a outras nacións, xuntareinos na súa terra e non deixarei que volva quedar alá ningún deles.

²⁹Nin lles volverei esconder a miña cara porque vertín o meu espírito sobre a Casa de Israel —é o meu Señor, Iavé, quen fala—.