Read Biblia SEPT Ezequiel 45 Bible Online

Ezequiel 45 - Biblia SEPT bible

Ezequiel 45

¹Cando repartades en porcións a terra, reservade para o Señor unha parte de ofrenda, unha parte sacra separada do resto da terra, de vinte e cinco mil cóbados de longo e dez mil cóbados de ancho. Será un lugar sagrado, con todo o seu muro de separación arredor.

²Disto deixarase para o santuario un cadrado de cincocentos por cincocentos cóbados todo arredor, e o santuario terá arredor unha eira de cincuenta cóbados.

³E despois destas medicións, mediredes vinte e cinco mil cóbados de longo por dez mil de ancho, pois aquí estará o santuario, o lugar máis santo,

⁴o máis sagrado do país; e isto será para os sacerdotes que son ministros do santuario, os que se acercan a dar culto ó Señor. Deste xeito terán un lugar para casas e mais un lugar sagrado para santuario.

⁵Vintecinco mil cóbados de longo por dez mil de ancho serán para os levitas, ministros oficiantes do templo; eles posuirán a súa cidade para habitar.

⁶E como propiedade de tal cidade, concederédeslle cinco mil cóbados de ancho por vinte e cinco mil cóbados de longo, ó lado da parte destinada ó santuario; isto será de toda a Casa de Israel.

⁷O príncipe tocaralle a un lado e ó outro do lugar do templo e da parte da cidade, enfronte ó lugar do templo e enfronte ó lugar da cidade, polo lado do poñente, cara ó mar; e polo lado do nacente, cara ó nacente, e a longura será do mesmo xeito para cada unha das partes: desde a fronteira do poñente ata a fronteira do nacente

⁸do país. Esta será a súa propiedade en Israel, e os meus príncipes xa non volverán oprimir o meu pobo, senón que lle repartirán a terra á Casa de Israel segundo as súas tribos.

⁹Así fala o Señor, Deus: —Xa hai abondo convosco, príncipes de Israel! Deixade a opresión e a violencia; practicade o dereito e a xustiza; retirade as vosas explotacións de sobre o meu pobo —é o Señor, Deus, quen fala—.

¹⁰Usade balanzas fieis e fanegas xustas e canadas xustas.

¹¹Que o efah e o bat teñan a mesma cabida: o bat que levante a décima parte do hómer, e o efah que levante tamén a décima parte do hómer: que a súa proporción se faga con hómer.

¹²O siclo son vinte gueras; vinte siclos máis vinte e cinco siclos máis quince siclos serán para vós unha mina.

¹³Este será o imposto que vós recolleredes: seis efáhs por hómer de trigo e outros seis efáhs por hómer de centeo.

¹⁴Velaí o precepto do aceite, do bat de aceite: a décima parte dun bat por cada kor, pois dez bates fan un hómer e tamén dez bates fan un kor.

¹⁵Tamén unha res do rabaño por cada duascentas reses do ben regado chan de Israel será para a ofrenda, para o holocausto, para o sacrificio de comuñón, para facer a expiación sobre eles —é o meu Señor, Iavé, quen fala—.

¹⁶Toda a poboación do país terá parte nesta contribución a favor do príncipe de Israel,

¹⁷pois o príncipe é o responsable dos holocaustos, da ofrenda, das libacións nas festas, nas lúas novas, nos sábados e en todas as romarías da Casa de Israel. El mesmo fará o sacrificio polos pecados, a ofrenda, o holocausto e os sacrificios de comuñón para facer a expiación en favor da Casa de Israel.

¹⁸Así fala o meu Señor, Iavé: —O día primeiro do primeiro mes collerás un becerro, fillo de vaca, sen defecto, e purificarás de pecados o santuario.

¹⁹O sacerdote collerá o sangue do sacrificio de purificación dos pecados, e untará con el os marcos do santuario, as catro esquinas do zócalo do altar e os marcos da porta do adro interior.

²⁰O mesmo has de facer o día sete dese mes, por mor do home que pecou por descoido ou por ignorancia, e así facedes a expiación do templo.

²¹O día catorce do mes primeiro celebraredes a Pascua, unha festa de sete días, nos que se comerá pan sen fermento.

²²Ese día, o príncipe ofrecerá un becerro en sacrificio de expiación por si mesmo e por toda a poboación do país.

²³Durante os sete días de festa, ofreceralle ó Señor, cada día, un holocausto de sete becerros e sete carneiros, sen defecto. Durante os sete días tamén ofrecerá, cada día, un sacrificio de expiación polo pecado, un chibo,

²⁴e fará a ofrenda dun efah de fariña por becerro e doutro efah por carneiro e dun hin de aceite por cada efah de fariña.

²⁵Na festa do día quince do sétimo mes farase o mesmo que nestes sete días: os mesmos sacrificios de expiación polo pecado, os mesmos holocaustos, a mesma ofrenda e o mesmo aceite.