Read Biblia SEPT Ezequiel 48 Bible Online

Ezequiel 48 - Biblia SEPT bible

Ezequiel 48

¹Estes son os nomes das tribos: Desde o extremo norte, seguindo cara á comarca que se atopa camiño de Hetlón, á entrada de Hamat, seguindo cara a Masar—Enán, e a fronteira de Damasco cara ó norte, e á comarca de Hamat: todo desde o lado do nacente ata o poñente, esta será a parte de Dan.

²A beira do territorio de Dan, desde o lado do nacente ata o lado do poñente, estará o territorio de Axer.

³A beira do territorio de Axer, desde o lado do nacente ata o lado do poñente, estará o territorio de Naftalí.

⁴A beira do territorio de Naftalí, desde o lado do nacente ata o lado do poñente, estará o territorio de Menaxés.

⁵A beira do territorio de Menaxés, desde o lado do nacente ata o lado do poñente, estará o territorio de Efraím.

⁶A beira do territorio de Efraím, desde o lado do nacente ata o lado do poñente, estará o territorio de Rubén.

⁷A beira do territorio de Rubén, desde o lado do nacente ata o lado do poñente, estará o territorio de Xudá.

⁸A beira do territorio de Xudá, desde o lado do nacente ata o lado do poñente, estará a ofrenda de terra que vós ofrendaredes, de vinte e cinco mil cóbados de longo e de ancho, desde o lado do nacente ó lado do poñente, o mesmo que cada unha das outras partes. No medio dela estará o santuario.

⁹A ofrenda de terra que vós ofrendaredes ó Señor será de vinte e cinco mil cóbados de longo e dez mil de ancho.

¹⁰A ofrenda da terra para o santuario será para estes: Para os sacerdotes: vinte e cinco mil cóbados de longo ata o norte; cara ó poñente, dez mil cóbados de ancho; cara ó nacente, dez mil cóbados; e cara ó sur de ancho, vinte e cinco mil cóbados; e no medio estará o santuario do Señor.

¹¹Para os sacerdotes, os consagrados de entre os fillos de Sadoc, que cumpriron as miñas prescricións cúlticas —pois non se desviaron, cando se extraviaron os fillos de Israel, como se desviaron os levitas—,

¹²eles terán unha parte ofrecida da ofrenda da terra, a parte máis santa, ó lado do territorio dos levitas.

¹³En canto ós levitas, o seu territorio será parello ó dos sacerdotes: vinte e cinco mil cóbados de ancho e dez mil de longo. En total, o ancho da ofrenda da terra será de vinte e cinco mil cóbados e dez mil ó longo.

¹⁴Non poderán vender nada, nin se poderá cambiar nin traspasar nada desta parte da terra, pois é cousa consagrada ó Señor.

¹⁵Os cinco mil cóbados que quedan de longo ó lado dos vinte e cinco mil, serán a zona profana da cidade, para solares e pasteiros comunais; e no medio estará a cidade.

¹⁶As súas dimensións serán estas: pola banda do norte, catro mil cincocentos cóbados; e pola banda do sur, catro mil cincocentos cóbados; pola banda do nacente, catro mil cincocentos cóbados; e pola banda do poñente, catro mil cincocentos cóbados.

¹⁷Os pasteiros comunais da cidade terán: cara ó norte, douscentos cincuenta cóbados; cara ó sur, douscentos cincuenta cóbados; cara ó nacente, douscentos cincuenta; e cara ó poñente, douscentos cincuenta cóbados.

¹⁸O que queda dentro da anchura proporcional á ofrenda da terra do santuario, serán dez mil cóbados cara ó nacente e dez mil cóbados cara ó poñente, e será proporcional á ofrenda da terra do santuario; e co que produza comerán os empregados da cidade.

¹⁹Os empregados da cidade, procedentes de todas as tribos de Israel, serán os que traballen este resto.

²⁰O total da ofrenda da terra será de vinte e cinco mil cóbados por vinte e cinco mil, e a cuarta parte dela ofrecerédela en ofrenda sacra para a propiedade da cidade.

²¹O resto será para o príncipe, a un lado e ó outro da terra ofrendada ó santuario e da propiedade da cidade: desde a fronteira de vinte e cinco mil cóbados da ofrenda da terra ata a fronteira do nacente; e polo poñente, desde a fronteira de vinte e cinco mil cóbados ata a fronteira do poñente. O príncipe corresponderalle igual cás outras partes, pero terá no medio a ofrenda da terra para o santuario e o santuario do templo.

²²Desde a propiedade dos levitas e desde a propiedade da cidade, no medio dos terreos para o príncipe, entre a fronteira de Xudá e a parte de Benxamín, estarán os terreos para o príncipe.

²³Resto das tribos: desde o lado do nacente ata o lado do poñente estará o territorio de Benxamín.

²⁴A beira do territorio de Benxamín, desde o lado do nacente ata o lado do poñente, estará o territorio de Simeón.

²⁵A beira do territorio de Simeón, desde o lado do nacente ata o lado do poñente, estará o territorio de Isacar.

²⁶A beira do territorio de Isacar, desde o lado do nacente ata o lado do poñente, estará o territorio de Zebulón.

²⁷A beira do territorio de Zebulón, desde a banda do nacente ata a banda do poñente, estará o territorio de Gad.

²⁸A beira da fronteira estará Gad, cara á fronteira do Négueb cara ó sur; e a fronteira será desde Tamar, e o oasis de Meribah de Cadex, seguindo o río cara ó mar Mediterráneo.

²⁹Esta será a terra que vos repartiredes ás sortes de entre a herdanza que lles pertence ás tribos de Israel, e estas son as partes —é o Señor, Deus, quen fala—.

³⁰Estas serán as saídas da cidade: pola cara do norte, catro mil cincocentos cóbados de medida,

³¹e as portas da cidade serán motivo para lembranza das tribos de Israel. Polo norte tres portas: a porta de Rubén, a porta de Xudá e a porta de Leví.

³²Pola cara do nacente catro mil cincocentos cóbados e tres portas: a porta de Xosé, a porta de Benxamín e a porta de Dan.

³³O lado sur terá catro mil cincocentos cóbados de medida e tres portas: a porta de Simeón, a porta de Isacar e a porta de Zebulón.

³⁴A cara do poñente terá catro mil cincocentos cóbados e tres portas das tribos: a porta de Gad, a porta de Axer e a porta de Naftalí.

³⁵A volta será de dezaoito mil cóbados. E desde ese día o nome da cidade será "O Señor está alí"".