Read Biblia SEPT Oseas 12 Bible Online

Oseas 12 - Biblia SEPT bible

Oseas 12

¹Efraím tenme rodeado de mentira; e de falsidade, a casa de Israel. Tamén Xudá segue índose co deus El, e segue confiando nos ídolos.

²Efraím pastorea o vento e segue tralo vento leste todo o día, a Mentira e os demos multiplícanse. Por iso conclúen alianza con Asiria, e levan aceite a Exipto.

³Velaí o preito do Señor con Israel para lle pedir contas a Xacob do seu comportamento, para lle devolver a paga das súas accións.

⁴No ventre da nai suplantou a seu irmán, e sendo xa maduro loitou con Deus.

⁵Tamén loitou contra un anxo e venceuno. Chorou e pediulle que tivese compaixón. En Betel atopouno e alí falou con el:

⁶"O Señor é o Deus dos Exércitos, Iavé é o seu tratamento.

⁷Pero ti, vólvete ó teu Deus, garda a fidelidade e a xustiza, confía sempre no teu Deus.

⁸Canaán ten na súa man unha balanza falsa, gústalle estafar".

⁹Entón Efraím respondeu: "Xa me volvín rico, conseguín riqueza para min; todas as miñas ganancias abondan para me acusar de culpa e pecado".

¹⁰"Eu son o Señor, o teu Deus, desde o país de Exipto: obrigareite a vivir en tendas coma nos días do encontro.

¹¹Falareilles ós profetas, e eu mesmo lles multiplicarei as visións e por medio dos profetas falarei en parábolas".

¹²Si, Galaad foi unha mentira idolátrica, certamente eles foron unha falsidade. En Guilgal ofrecían sacrificios de touros, por iso os seus altares vólvense moreas de pedras nos sucos do campo.

¹³Xacob fuxiu ó campo de Siria, e Israel serviu coma servo por causa dunha muller, e por unha muller gardou rabaños.

¹⁴Pero o Señor fixo subir a Israel de Exipto mediante un profeta, e por medio dun profeta foi pastoreado Israel.

¹⁵Efraím provocoulle ó Señor unha amarguísima pena, pero El esparexerá sobre Efraím o sangue vertido, o meu Señor devolveralle as súas inxurias.