Read Biblia SEPT Oseas 8 Bible Online

Oseas 8 - Biblia SEPT bible

Oseas 8

¹Fai da túa boca unha trompeta: unha aguia está sobre a casa do Señor! Porque transgrediron a miña Alianza e reviráronse contra a miña lei.

²A min claman eles: "Deus de Israel, nós recoñecémoste!"

³Israel rexeitou ó Bo, seguiron ó inimigo.

⁴Eles constituíron reis, pero sen contar comigo, constitúen xefes, pero non os recoñezo. Da súa prata e do seu ouro fixeron ídolos, para se aniquilaren eles mesmos.

⁵Certo que rexeitei o becerro de Samaría, a miña ira arde contra eles. Ata que día serán incapaces da pureza?

⁶Si, é cousa que veu de Israel: faino un artista, por iso non é Deus; en anacos será convertido o becerro de Samaría.

⁷Abofé, sementan vento e recollen tempestades. A anada non ten froito, non produce gran, se producise algún, devoraríano estranxeiros.

⁸Devoran a Israel: agora está entre os pobos coma un obxecto sen valor.

⁹Velaí soben a Asiria; Efraím é un asno salvaxe: non é fecundo, pero dánselle os amoríos.

¹⁰Si, dánselle ben os amoríos coas nacións, pero vouno agarrar: retorcerase algún tempo baixo o peso do rei de príncipes.

¹¹Si, Efraím multiplicou os seus altares para arrepentirse, pero os altares servíronlle para pecar.

¹²Escríbolles con abundancia as miñas leis, e considéranas coma cousa allea.

¹³Ofrecen sacrificios, por amor a min e comen a súa carne, pero o Señor non se comprace neles. Agora El lembra as súas culpas e castiga os seus pecados. Si, teñen que volver a Exipto.

¹⁴Israel esqueceu o seu Creador e construíu palacios. Xudá multiplicou as cidades nas alturas. Pero eu mando lume contra as súas cidades, que devorará os seus palacios.