Read Biblia SEPT Amós 1 Bible Online

Amós 1 - Biblia SEPT bible

Amós 1

¹Palabras de Amós, que pertenceu ó gremio dos pastores de Técoa, do que viu no tocante a Israel en tempos de Ozías, rei de Xudá, e en tempos de Ieroboam, fillo de Ioax, rei de Israel, dous anos antes do terremoto.

²Velaquí o que dixo: "Brama Iavé desde Sión, desde Xerusalén ergue a súa voz e murchan os pasteiros dos pastores, seca o cumio do Carmelo".

³Así di Iavé: "Por causa de tres delitos de Damasco e mais por catro non me hei domear: Por mallar co mallo de ferro a Galaad,

⁴heille meter lume ó casal de Hazael, que engulipe os pazos de Ben-Hadad.

⁵Quebrarei os ferrollos de Damasco, exterminarei o soberano de Val de Vans e o que leva o cetro de Vila Leda e o pobo de Aram será deportado a Quir": dixo Iavé.

⁶Así di Iavé: "Por causa de tres delitos de Gaza e mais por catro non me hei domear: Por facer deportacións masivas; para entregalas a Edom

⁷heille meter lume á muralla de Gaza ata que engulipe os seus pazos.

⁸Exterminarei o soberano de Axdod e o que leva o cetro de Axquelón, tornarei a miña man contra Ecrón e o resto dos filisteos perecerá", dixo o meu Señor Iavé.

⁹Así di Iavé: "Por causa de tres delitos de Tiro e mais por catro non me hei domear: Por entregar deportacións masivas a Edom esquecendo o pacto de fraternidade,

¹⁰heille meter lume á muralla de Tiro ata que engulipe os seus pazos".

¹¹Así di Iavé: "Por causa de tres delitos de Edom e mais por catro non me hei domear: Por perseguir a seu irmán coa espada e matar sen compaixón, porque a súa carraxe depreda sen acougo e mantense a cotío a súa ira,

¹²heille meter lume a Temán que engulipe os pazos de Bosrah".

¹³Así di Iavé: "Por causa de tres delitos dos amonitas e mais por catro non me hei domear: Por fender o ventre das embarazadas de Galaad co gallo de ampliar as súas fronteiras,

¹⁴heille meter lume á muralla de Rabah ata que engulipe os seus pazos entre o ouvear do día da batalla e o balbordo do día da galerna,

¹⁵e o seu rei partirá deportado, el xunto cos seus ministros": dixo Iavé.