Read Biblia SEPT Números 1 Bible Online

Números 1 - Biblia SEPT bible

Números 1

¹No deserto do Sinaí, na Tenda do Encontro, no primeiro día do segundo mes, no segundo ano despois da saída do país de Exipto, díxolle o Señor a Moisés:

²—"Facede o censo xeral de todos os israelitas, por familias e por casas patriarcais, escribindo o nome de cada un dos varóns,

³dos vinte anos para arriba, capaces de manexar as armas en Israel. Alistádeos para os respectivos exércitos, ti e Aharón.

⁴Teredes presentes convosco un home de cada tribo, o xefe de cada familia patriarcal.

⁵Os nomes dos homes que estarán convosco serán estes: De Rubén, Elisur, fillo de Xedeur.

⁶De Simeón, Xelumiel, fillo de Surixadai.

⁷De Xudá, Nahxón, fillo de Aminadab.

⁸De Isacar, Natanael, fillo de Suar.

⁹De Zebulón, Eliab, fillo de Helón.

¹⁰Dos fillos de Xosé: por Efraím, Elixamá, fillo de Ammihud; por Menaxés, Gamaliel, fillo de Pedahsur.

¹¹De Benxamín, Abidán, fillo de Guideón.

¹²De Dan, Ahiezer, fillo de Amixadai.

¹³De Axer, Paguiel, fillo de Ocrán.

¹⁴De Gad, Eliasaf, fillo de Deuel.

¹⁵De Naftalí, Ahira, fillo de Enán.

¹⁶Estes son os escollidos como cabezas das respectivas familias patriarcais; son xefes de milleiros en Israel".

¹⁷Moisés e Aharón rexistraron a todos estes homes chamados polo seu nome,

¹⁸e mandaron xuntar a toda a comunidade no primeiro día do mes segundo. Fixeron o seu censo por familias e por casas patriarcais, rexistrando o nome de cada varón de máis de vinte anos, xunto co seu xefe correspondente,

¹⁹conforme o tiña mandado Iavé a Moisés. Fixo o censo no deserto do Sinaí.

²⁰Dos descendentes de Rubén, primoxénito de Israel, contados por familias e por casas patriarcais, rexistraron os nomes dos varóns de máis de vinte anos, todos os que podían ir á guerra:

²¹total 46.500 da tribo de Rubén.

²²Dos descendentes de Simeón, feito o reconto da súa tribo por familias e por casas patriarcais, chamados polo nome xunto co seu xefe, todos os varóns, que podían ir á guerra, de vinte anos para arriba:

²³foron 59.300 da tribo de Simeón.

²⁴Dos descendentes de Gad, feito o reconto da súa tribo por familias e casas patriarcais, chamados polo seu nome, os que podían ir á guerra de máis de vinte anos para arriba:

²⁵contáronse 45.650 da tribo de Gad.

²⁶Dos descendentes de Xudá por familias e por casas patriarcais, o número dos nomes dos varóns de vinte anos para arriba, todos os que podían ir á guerra:

²⁷contaron 74.600 da tribo de Xudá.

²⁸Dos descendentes de Isacar, por familias e casas patriarcais, chamados polo nome do seu xefe, os varóns de vinte anos para arriba, todos os que podían ir á guerra:

²⁹foron contados 54.400 da tribo de Isacar.

³⁰Dos descendentes de Zebulón, por familias e casas patriarcais, o número dos nomes dos varóns, de vinte anos para arriba, todos os que podían ir á guerra:

³¹o total foi de 57.400 da tribo de Zebulón.

³²Dos descendentes de Xosé, os fillos de Efraím por familias e casas patriarcais, chamados polo nome dos varóns de vinte anos para arriba, todos os que podían ir á guerra:

³³feito o reconto, deu un total de 40.500 da tribo de Efraím.

³⁴Dos fillos de Menaxés, por familias e casas patriarcais, chamados polo nome, os varóns de vinte anos para arriba, todos os que podían ir á guerra:

³⁵feito o reconto da tribo de Menaxés, deu un total de 32.200.

³⁶Dos descendentes de Benxamín, por familias e casas patriarcais, chamados polo nome os varóns de vinte anos para arriba, todos os que podían ir á guerra:

³⁷o reconto deu un total de 35.400 da tribo de Benxamín.

³⁸Dos descendentes de Dan, por familias e casas patriarcais, chamados polo nome os varóns de vinte anos para arriba, todos os que podían ir á guerra:

³⁹feito o reconto, deu un total de 62.700 da tribo de Dan.

⁴⁰Dos descendentes de Axer, por familias e casas patriarcais, chamados polo nome os varóns de máis de vinte anos para arriba, todos os que podían ir á guerra:

⁴¹feito o reconto, deu un total de 41.500 da tribo de Axer.

⁴²Dos descendentes de Naftalí, por familias e casas patriarcais, chamados polo nome os varóns de vinte anos para arriba, todos os que podían ir á guerra:

⁴³feito o reconto, deu un total de 53.400 da tribo de Naftalí.

⁴⁴Estes son os que foron censados por Moisés e Aharón e polos xefes dos israelitas: doce homes, un por cada tribo, representando a súa casa patriarcal.

⁴⁵O total dos contados dos fillos de Israel por casas patriarcais, varóns de vinte anos para arriba, os que podían ir á guerra en Israel,

⁴⁶por xunto todos os censados son 603.550 homes.

⁴⁷Os levitas, con todo, non foron rexistrados entre os alistados para a guerra, segundo as casas patriarcais da súa tribo.

⁴⁸O Señor dixéralle a Moisés:

⁴⁹—"Non debes alistar ós da tribo de Leví, nin ós seus cabezas de familia entre os fillos de Israel.

⁵⁰Débeslles confiar a eles o coidado da Morada do Testemuño e de todos os seus vasos sagrados e de canto pertence ás cerimonias. Soamente eles os poderán transportar e soamente eles os poderán manexar e meter na Tenda da Alianza. Acamparán arredor do tabernáculo.

⁵¹Cando o tabernáculo teña que ser transportado, só eles poderán desarmalo, e cando teñan que erguelo, serán os levitas quen o farán; calquera estraño que se achegue para tocalo, será castigado coa morte.

⁵²Os fillos de Israel erguerán as súas tendas, cada un no propio campamento, onda a correspondente bandeira.

⁵³Pero os levitas acamparán arredor do Tabernáculo do Testemuño, de tal xeito que os fillos de Israel non caian no castigo de Deus. Soamente a eles lles corresponde gardar o Tabernáculo do Testemuño".

⁵⁴Os fillos de Israel cumpriron todas estas cousas, facéndoas conforme lle tiña ordenado o Señor a Moisés.