Read Biblia SEPT Números 13 Bible Online

Números 13 - Biblia SEPT bible

Números 13

¹Faloulle o Señor a Moisés:

²—"Manda homes que che exploren o país de Canaán, que eu lles vou dar ós fillos de Israel; un home por cada unha das tribos de seus pais; serán tomados entre os príncipes.

³Enviounos, pois, Moisés desde o deserto de Parán, segundo a orde do Señor. Todos eles eran xefes entre os fillos de Israel.

⁴Estes eran os seus nomes: Pola tribo de Rubén, Xamúa, fillo de Zacur.

⁵Pola tribo de Simeón, Xafat, fillo de Horí.

⁶Pola tribo de Xudá, Caleb, fillo de Iefuneh.

⁷Pola tribo de Isacar, Igal, fillo de Xosé.

⁸Pola tribo de Efraím, Xosué, fillo de Nun.

⁹Pola tribo de Benxamín, Paltí, fillo de Rafú.

¹⁰Pola tribo de Zebulón, Gadiel, fillo de Sodí.

¹¹Pola tribo de Xosé, tribo de Menaxés, Gadí, fillo de Susí.

¹²Pola tribo de Dan, Amiel, fillo de Guemalí.

¹³Pola tribo de Axer, Setur, fillo de Micael.

¹⁴Pola tribo de Naftalí, Nahbí, fillo de Volfsí.

¹⁵Pola tribo de Gad, Guenel, fillo de Maquí.

¹⁶Estes son os nomes dos varóns que enviou Moisés a explorar o país. E Moisés a Hoxeas, fillo de Nun, cambioulle o nome polo de Xosué.

¹⁷Moisés enviounos a explorar o país de Canaán, e díxolles: —"Subide polo deserto e escalade logo a montaña.

¹⁸Ollaredes ben a terra, como é, e o pobo que nela habita: se é forte ou feble, se escaso ou numeroso;

¹⁹e tamén como é a terra na que habita: se é boa ou mala; e como son as cidades nas que mora: se abertas ou fortificadas;

²⁰e como é o terreo: se fértil ou estéril, se hai nel árbores ou non. Animádevos e collede froitos da terra!" Era entón o tempo das uvas temperás.

²¹Subiron, logo, e exploraron o país desde o deserto de Sin ata Rehob, camiño de Hamat.

²²Subiron polo Négueb e chegaron a Hebrón, onde estaban Ahimán, Xexai e Talmai, descendentes de Anac. Hebrón fora edificada sete anos antes ca Soán do Exipto.

²³Logo chegaron ó Val do Acio, onde cortaron un acio de uvas, que cargaron entre dous mediante unha vara, e granadas e figos.

²⁴A aquel lugar chamóuselle Val do Acio, porque alí o cortaran os fillos de Israel.

²⁵Volveron da exploración da terra, pasados corenta días.

²⁶Chegaron xunto a Moisés e Aharón e toda a comunidade dos fillos de Israel, no deserto de Parán, en Cadex, e déronlles conta a eles e a toda a asemblea mostrándolles os froitos do país.

²⁷E contaron: —"Fomos á terra, onde ti nos enviaches: verdadeiramente é un país que deita leite e mel. Velaquí os seus froitos!

²⁸Pero o pobo que habita o país é forte, e as cidades, fortificadas e moi grandes. Alí vimos tamén os descendentes de Anac.

²⁹Amalec habita no país do Négueb; o hitita, o iebuseo e o amorreo habitan na montaña, e o cananeo mora onda o mar e na beira do Xordán".

³⁰Entón Caleb tratou de calmar o pobo, que murmuraba contra Moisés, e exclamou: —"Subamos sen medo e apoderémonos do país, porque nós podemos con eles!"

³¹Mais os homes que subiran con el, dixeron: —"Non podemos subir contra ese pobo, pois é máis forte ca nós".

³²E desacreditaban ante os fillos de Israel a terra que exploraran, dicindo: —"O país por onde pasamos, ó facermos a exploración, é un país que devora os seus habitantes, e toda a poboación que vimos no medio del son homes de estatura moi grande.

³³Alí vimos xigantes descendentes de Anac, raza de xigantes, e resultabamos, ós nosos propios ollos, coma saltóns, e o mesmo lles debiamos parecer tamén a eles".