Read Biblia SEPT Números 26 Bible Online

Números 26 - Biblia SEPT bible

Números 26

¹Aconteceu que despois da praga, díxolles o Señor a Moisés e a Elazar, fillo do sacerdote Aharón:

²—"Facede o censo de toda a comunidade dos fillos de Israel desde os vinte anos para arriba, conforme as súas casas patriarcais, e todos os aptos para o servizo militar en Israel".

³Moisés e mais Elazar, sacerdote, faláronlles, pois, nas planicies de Moab, xunto ó Xordán, preto de Xericó, dicindo:

⁴—"Vaise facer un censo desde a idade de vinte anos para arriba, conforme o Señor ordenara a Moisés". Os fillos de Israel que saíran do país de Exipto foron:

⁵Rubén, primoxénito de Israel. Fillos de Rubén: de Henoc, a familia dos henoquitas; de Palú, a familia dos paluítas;

⁶de Hesrón, a familia dos hesronitas; de Carmí, a familia dos carmitas.

⁷Tales son as familias dos rubenitas, e o seus alistados foron corenta e tres mil setecentos trinta.

⁸Fillos de Palú: Eliab.

⁹Os fillos de Eliab: Nemuel, Datán e Abiram, que son os membros do consello da comunidade, que se levantaran contra Moisés e Aharón na sedición de Coré, cando se levantaron contra o Señor.

¹⁰(Entón a terra abriu a súa boca e enguliunos xuntamente con Coré; así morreron os da sedición, devorando o lume douscentos cincuenta homes, para que servisen de escarmento;

¹¹mais os fillos de Coré non morreron).

¹²Fillos de Simeón segundo as súas familias: de Nemuel, a familia dos nemuelitas; de Iamín, a familia dos iaminitas; de Iaquín, a familia dos iaquinitas;

¹³de Zérah, a familia dos zarhitas; de Xaúl, a familia dos xaulitas.

¹⁴Tales son as familias dos simeonitas: 22.200.

¹⁵Fillos de Gad segundo as súas familias: de Sefón, a familia dos sefonitas; de Haguí, a familia dos haguitas; de Xuní, a familia dos xunitas;

¹⁶de Ozní, a familia dos oznitas; de Erí, a familia dos eritas;

¹⁷de Arod, a familia dos aroditas; de Arelí, a familia dos arelitas.

¹⁸Tales son as familias dos fillos de Gad conforme os seus alistados: 40.500.

¹⁹Fillos de Xudá: Er e Onán; pero Er e Onán morreron no país de Canaán.

²⁰Despois os fillos de Xudá, segundo as súas familias foron: de Xelah, a familia dos xelanitas; de Peres, a familia dos peresitas; de Zérah, a familia dos zeranitas.

²¹Os fillos de Peres foron: de Hesrón, a familia dos hesronitas; de Hamul, a familia dos hamulitas.

²²Tales son as familias de Xudá conforme os seus rexistros: 76.500.

²³Fillos de Isacar, segundo as súas familias: de Tolá, a familia dos tolaítas; de Puvah, a familia dos puvitas;

²⁴de Iaxub, a familia dos iaxubitas; de Ximrón, a familia dos ximronitas.

²⁵Tales son as familias de Isacar, conforme os seus rexistros: 64.300.

²⁶Fillos de Zebulón segundo as súas familias: de Séred, a familia dos sarditas; de Elón, a familia dos elonitas; de Iahlel, a familia dos iahlelitas.

²⁷Tales son as familias dos zebulonitas conforme os seus rexistros: 60.500.

²⁸Fillos de Xosé segundo as súas familias: Menaxés e Efraím.

²⁹Fillos de Menaxés: de Maquir, a familia dos maquiritas. Maquir xerou a Galaad. De Galaad, a familia dos galaaditas.

³⁰Estes son os fillos de Galaad: de Iézer, a familia dos iezeritas; de Hélec, a familia dos helquitas;

³¹de Asriel, a familia dos asrielitas; de Xequem, a familia dos xequemitas;

³²de Xemidá, a familia dos xemidaítas; de Héfer, a familia dos heferitas.

³³Selofad, fillo de Héfer, non tivo fillos, senón fillas, e os nomes das fillas de Selofad foron: Mahlah, Noah, Hoglah, Milcah e Tirsah.

³⁴Tales son as familias de Menaxés e os seus rexistrados eran 52.700.

³⁵Estes son os fillos de Efraím segundo as súas familias: de Xutélah, a familia dos xutelahítas; de Béquer, a familia dos bequeritas; de Táhan, a familia dos tahanitas,

³⁶fillos de Xutélah: de Erán, a familia dos eranitas.

³⁷Tales son as familias dos fillos de Efraím conforme os seus rexistros: 32.500. Estes son os fillos de Xosé segundo as súas familias.

³⁸Fillos de Benxamín segundo as súas familias: de Bela, a familia dos belaítas; de Axbel, a familia dos axbelitas; de Ahiram, a familia dos ahiramitas;

³⁹de Xufam, a familia dos xufamitas; de Hufam, a familia dos hufamitas.

⁴⁰Fillos de Bela foron: Ered e Naamán. De Ered, a familia dos ereditas; e de Naamán, a familia dos naamitas.

⁴¹Tales son os fillos de Benxamín segundo as súas familias, e os seus rexistrados: 45.600.

⁴²Estes son os fillos de Dan segundo as súas familias: de Xuham, a familia dos xuhamitas. Tales son as familias de Dan segundo as súas familias.

⁴³Todas as familias xuhamitas, segundo os seus rexistrados: 64.400.

⁴⁴Fillos de Axer segundo as súas familias: de Iemnah, a familia dos iemnaítas; de Iesui, a familia dos iesuítas; de Beriah, a familia dos beriitas.

⁴⁵Dos fillos de Beriah: de Héber, a familia dos heberitas; de Malquiel, a familia dos malquielitas.

⁴⁶O nome da filla de Axer era Sárah.

⁴⁷Tales son as familias dos fillos de Axer conforme ós seus rexistros: 53.400.

⁴⁸Fillos de Naftalí segundo as súas familias: de Iahsel, a familia dos iahselitas; de Guní, a familia dos gunitas;

⁴⁹de Iéser, a familia dos ieseritas; de Xilem, a familia dos xilemitas.

⁵⁰Tales son as familias de Naftalí segundo as súas familias e os seus rexistros, 45.400.

⁵¹Estes son os rexistrados dos fillos de Israel: 601.730.

⁵²O Señor díxolle a Moisés:

⁵³—"A estes seralles repartido o país en concepto de herdanza, conforme o número de inscritos.

⁵⁴Os máis numerosos formaraslles unha herdade grande e ós máis pequenos formaraslles unha herdade menor; a cada un daraslles a súa herdanza conforme os seus rexistrados.

⁵⁵Soamente por sorte se repartirá a terra; herdarán segundo os nomes das tribos dos pais.

⁵⁶Por sortes repartirás a herdanza, entre o numeroso e o pequeno".

⁵⁷E estes son os rexistrados dos levitas segundo as súas familias: de Guerxón, a familia dos guerxonitas; de Quehat, a familia dos quehatitas; de Merarí, a familia dos meraritas.

⁵⁸Tales son as familias de Leví: a familia dos lobnitas, a familia dos hebronitas, a familia dos mahlitas, a familia dos muxitas, a familia dos coreítas. Quehat xerou a Amram.

⁵⁹O nome da muller de Amram era Ioquébed, filla de Leví, que lle naceu a Leví en Exipto. Ela xerou a Amram, a Aharón, Moisés e mais a María, súa irmá.

⁶⁰A Aharón nacéronlle Nadab, Abihú, Elazar e Itamar.

⁶¹Nadab e Abihú morreron ó ofreceren eles un lume profano ante o Señor.

⁶²Os seus rexistrados foron 23.000, todos varóns dun mes para arriba. Estes non foran rexistrados entre os fillos de Israel, porque non se repartira herdanza entre eles.

⁶³Tales son os empadroados por Moisés e Elazar, sacerdote, que fixeron o censo dos fillos de Israel nas planicies de Moab, xunto ó Xordán, cerca de Xericó.

⁶⁴Entre eles non existía xa ningún dos rexistrados por Moisés e polo sacerdote Aharón, que fixeran o censo dos fillos de Israel no deserto de Sinaí.

⁶⁵O Señor dixera deles: —"Morrerán todos no deserto". De feito, non quedou ningún deles, se non é Caleb, fillo de Iefuneh, e Xosué, fillo de Nun.