Read Biblia SEPT Números 3 Bible Online

Números 3 - Biblia SEPT bible

Números 3

¹Estes son os descendentes de Moisés e Aharón, no día en que lle falou o Señor a Moisés no monte Sinaí.

²E os nomes dos fillos de Aharón son: Nadab, o seu primoxénito, Abihú, Elazar e Itamar.

³Estes son os nomes dos fillos de Aharón, consagrados e unxidos, para exerceren o sacerdocio con plenitude de poderes.

⁴Mortos Nadab e Abihú na presenza do Señor, por prenderen un lume profano diante del no deserto do Sinaí, e non deixando fillos, quedaron só Elazar e Itamar para exercer o sacerdocio baixo a autoridade do seu pai Aharón.

⁵Díxolle o Señor a Moisés:

⁶—"Manda viren os da tribo de Leví á presenza de Aharón, para que o axuden no seu servizo.

⁷Encargaranse de facer todas as gardas que lles correspondan a el e á comunidade reunida na Tenda do Testemuño e farán así todos os servizos do tabernáculo.

⁸Coidarán todos os ornamentos e demais obxectos da Tenda da Alianza e procurarán todo canto lles cumpra ós israelitas reunidos no tabernáculo.

⁹Porás os levitas baixo as ordes de Aharón e de seus fillos, e serán como unha oblación perfecta de entre os fillos de Israel para o seu servizo.

¹⁰Para Aharón e seus fillos farás un estatuto das funcións que eles poderán desempeñar no exercicio do seu sacerdocio; calquera estraño que llelas queira usurpar será castigado coa morte".

¹¹Díxolle o Señor a Moisés:

¹²—"Velaí que eu escollín de entre os fillos de Israel os levitas no lugar de todos os primoxénitos, de todos os que abren o seo materno, entre os fillos de Israel. Os levitas serán da miña pertenza,

¹³porque todo primoxénito é meu, desde o día en que ferín a todos os primoxénitos na terra de Exipto e consagrei para min todo primoxénito de Israel, tanto dos homes como dos animais. Serán meus. Eu son o Señor".

¹⁴Díxolle o Señor a Moisés no deserto do Sinaí:

¹⁵—"Alista a todos os fillos de Leví por casas patriarcais e por familias, a todos os varóns desde un mes para arriba".

¹⁶Moisés fixo o censo conforme a palabra do Señor, tal como lle ordenara facer.

¹⁷Estes son os fillos de Leví polo seu nome: Guerxón, Quehat e Merarí.

¹⁸E estes outros son os nomes dos fillos de Guerxón, segundo as súas familias: Libní e Ximí.

¹⁹E os fillos de Quehat, conforme as súas familias: Amrán, Ishar, Hebrón e Uziel.

²⁰Os fillos de Merarí conforme as súas familias: Mahlí e Muxí. Estas son as familias de Leví polas súas casas patriarcais.

²¹De Guerxón naceu a familia de Libní e a de Ximí, ámbolos dous son os guerxonitas.

²²Anotados por número todos os varóns dun mes para arriba, deu un total de 7.500.

²³As familias dos guerxonitas acampaban detrás do Tabernáculo pola banda do solpor.

²⁴O xefe da casa dos guerxonitas era Eliasaf, fillo de Lael.

²⁵O coidado dos fillos de Guerxón, tanto na Tenda do Encontro coma no Tabernáculo, estaba a tenda mesma, a súa cuberta e a cortina de entrada na Tenda do Encontro,

²⁶As cortinas do adro, a cortina da entrada do mesmo, que se pón por enriba e ó redor do altar, e as cordas e todos os demais utensilios.

²⁷De Quehat descenden as familias de Amraní, de Isharí, de Hebrón e de Uziel: todos eles son a familia de Quehat.

²⁸Os nomes de todos os varóns de máis de un mes para arriba suman un total de 8.600, todos eles encargados da custodia do santuario.

²⁹As familias dos descendentes de Quehat acampaban a carón do tabernáculo polo mediodía.

³⁰O xefe dos quehatitas era Elisafán, fillo de Uziel.

³¹Tiñan ó seu cargo o coidado da Arca, da mesa, do candelabro, dos altares e demais utensilios sagrados do culto, da cortina e de todo o que se precisa no seu servizo.

³²O xefe supremo dos levitas era Elazar, fillo do sacerdote Aharón, a quen tiñan que obedecer todos os encargados do coidado do santuario.

³³De Merarí descenden as familias de Mahlí e de Muxí: estas son as familias meratitas.

³⁴Censados todos os varóns de máis dun mes para arriba, fixeron un total de 6.200.

³⁵O cabeza da casa patriarcal de Merarí era Suriel, fillo de Abihail, e tiñan que acampar polo costado norte do Santuario.

³⁶O cargo dos fillos de Merarí estaba coidar as táboas do Tabernáculo, as trabes, as columnas coas súas bases e todos os demais utensilios precisos para o seu servizo;

³⁷e tamén as columnas que están ó redor do adro, coas súas bases, cravos e cordas.

³⁸Os que acamparan diante do Tabernáculo, diante da Tenda do Encontro, polo abrente, son Moisés, Aharón, os seus fillos e os encargados das quendas da garda do santuario dos fillos de Israel; calquera estraño que se achegue, será condenado a morte.

³⁹O número de todos os levitas anotados por Moisés e Aharón, conforme a palabra do Señor, segundo a súa familia, todos os varóns de máis dun mes, sumaron un total de 22.000.

⁴⁰Díxolle o Señor a Moisés: —"Anota a todos os primoxénitos varóns dos fillos de Israel, dun mes para arriba, e fai unha lista de todos os seus nomes.

⁴¹Collerás para min —Eu son o Señor!— todos os levitas no canto dos primoxénitos dos israelitas, e os animais dos levitas no canto de todos os primoxénitos dos animais dos israelitas".

⁴²Moisés anotou, como lle mandara facer o Señor, a todos os primoxénitos dos fillos de Israel.

⁴³Contados todos os nomes dos varóns primoxénitos dun mes para arriba, deu un total de 22.273.

⁴⁴O Señor díxolle de novo a Moisés:

⁴⁵—"Colle os levitas no canto de todos os primoxénitos dos fillos de Israel, e os animais dos levitas no canto dos animais dos israelitas: serán todos para min. Eu son o Señor!

⁴⁶Como prezo do rescate polos douscentos setenta e tres primoxénitos dos israelitas que exceden do número dos levitas,

⁴⁷recibirás, por cada un, cinco siclos, do valor dos siclos de santuario, de vinte óbolos cada siclo.

⁴⁸Entregarás o diñeiro a Aharón e a seus fillos, é o prezo do rescate polos que exceden do seu número".

⁴⁹Colleu Moisés o diñeiro do rescate polos que excedían do número dos rescatados polos levitas.

⁵⁰Polos primoxénitos dos fillos de Israel, colleu en diñeiro 1.375 siclos, dos do santuario.

⁵¹E Moisés deulles o diñeiro do rescate a Aharón e a seus fillos, tal como llo mandara o Señor.