Read Biblia SEPT Números 31 Bible Online

Números 31 - Biblia SEPT bible

Números 31

²—"Vinga nos madianitas ós fillos de Israel. Despois xuntaraste cos antepasados do teu pobo".

³Moisés faloulle ó pobo: —"Disponde os homes para a guerra e vaian contra Madián, a fin de lles dar a vinganza do Señor nos madianitas.

⁴Mil por tribo, de todas as tribos de Israel, enviaredes á guerra".

⁵Foron, pois, escollidos das lexións de Israel mil por tribo, isto é, doce millares armados para a milicia.

⁶Moisés enviounos á milicia mil por tribo, ás ordes de Pinhas, fillo do sacerdote Elazar, portador dos obxectos sagrados e das trompetas de alarma.

⁷Eles pelexaron contra Madián, conforme lle mandara o Señor a Moisés, e mataron a todos os varóns.

⁸Amais dos soldados mortos mataron tamén ós reis de Madián: Evi, Requem, Sur, Hur e Reba, cinco reis madianitas. Ademais mataron á espada a Balaam, fillo de Beor.

⁹Os fillos de Israel ademais levaron cativas ás mulleres de Madián, cos seus meniños e saquearon todo o seu gando, todos os seus rabaños e toda a súa facenda.

¹⁰A todas as súas cidades nos seus diversos lugares de residencia e a todos os seus campamentos prendéronlles lume.

¹¹Colleron todo o botín e toda a presa feita en homes e en gando,

¹²e conduciron os cativos, o botín e mais a presa a Moisés, a Elazar, o sacerdote, e á comunidade dos fillos de Israel, que estaban no campamento situado nas planicies de Moab, xunto do Xordán, fronte a Xericó.

¹³Moisés, o sacerdote, Elazar e todos os príncipes da comunidade saíron ó seu encontro fóra do campamento.

¹⁴Moisés irouse contra os xefes do exército, xenerais e centurións que volvían da expedición guerreira,

¹⁵e díxolles: —"Mais por que deixastes con vida a todas estas mulleres?

¹⁶Ollade! Elas son as que por instigación de Balaam induciron ós fillos de Israel a apostataren do Señor por mor de Peor, e por esa causa caeu o castigo enriba da comunidade do Señor.

¹⁷Agora, pois, matade a todo varón entre os meniños e a toda muller que fixese o acto sexual con home.

¹⁸Pero reservade con vida para vós a todas as rapazas que non tiveron relacións sexuais con varón.

¹⁹E vós quedade fóra do campamento durante sete días. Todos os que matastes unha persoa e cantos tocastes un cadáver, purificarédesvos no terceiro e sétimo día, tanto vós coma os vosos prisioneiros.

²⁰Purificade tamén todo vestido, todo obxecto de pel, todo utensilio feito de pel de cabra e todo utensilio de madeira".

²¹O sacerdote Elazar díxolles ós homes da milicia que foran ó combate: —"Este é o precepto legal que o Señor ordenou a Moisés:

²²O ouro, a prata, o bronce, o ferro, o estaño e o chumbo,

²³todo o que resiste o lume, farédelo pasar polo lume e será puro; non obstante, terá de ser purificado coa auga lustral. E todo o que non resiste o lume, pasarédelo pola auga.

²⁴O día sétimo lavaredes os vosos vestidos, e seredes puros; e despois poderedes entrar no campamento".

²⁵Díxolle o Señor a Moisés:

²⁶—"Fai o inventario do botín collido en homes e gando, ti, o sacerdote Elazar e os xefes das casas paternas da comunidade.

²⁷Dividirás pola metade o botín entre os combatentes que foron á guerra e toda a comunidade.

²⁸Separarás para o Señor, como tributo dos guerreiros que foron á guerra, unha cabeza de cada cinco centos, tanto dos homes como dos bois, dos asnos e das ovellas;

²⁹collerédelo da metade que lles corresponde e daralo ó sacerdote Elazar como primicia para o Señor.

³⁰Da metade correspondente ós fillos de Israel tomarás a porcentaxe do un por cincuenta, tanto dos homes como dos bois, dos asnos e das ovellas, de todos os animais, e darásllelo ós levitas encargados do servizo do Tabernáculo do Señor".

³¹Moisés e o sacerdote Elazar fixeron como lle ordenara o Señor a Moisés.

³²O botín que o exército tomara coma presa foi: ovellas, 675.000 cabezas;

³³bois, 72.000;

³⁴Asnos, 71.000;

³⁵en canto a persoas, mulleres que non tiveran relacións con home, o total era de 32.000.

³⁶A metade adxudicada ós que foran á guerra deu un total de: ovellas, 337.500;

³⁷destas corresponden como tributo para o Señor 675.

³⁸Bois, 36.000, e o seu tributo para o Señor, 72.

³⁹Asnos, 30.500, e o seu tributo para o Señor, 61.

⁴⁰Persoas, 16.000, e o seu tributo para o Señor, 32.

⁴¹Moisés entregou o tributo como primicia do Señor ó sacerdote Elazar, conforme o Señor lle ordenara.

⁴²Canto á metade correspondente ós fillos de Israel que Moisés apartara da dos guerreiros,

⁴³esa metade da comunidade foi: ovellas, 337.500;

⁴⁴bois, 36.000;

⁴⁵Asnos, 30.500;

⁴⁶persoas, 16.000.

⁴⁷Moisés tomou desa metade dos israelitas a porcentaxe do un por cincuenta, tanto dos homes como dos animais, e entregouno ós levitas, que desempeñaban o servizo do Tabernáculo do Señor, conforme o Señor lle ordenara.

⁴⁸Logo presentáronse ante Moisés os xefes das unidades militares, os xenerais e os centurións,

⁴⁹e dixéronlle a Moisés: —"Os teus servos fixeron a conta dos combatentes que había á nosa disposición, e non faltou nin sequera un deles.

⁵⁰Presentamos, pois, como ofrenda ó Señor cada un o que gañou en obxectos de ouro: brazaletes, pulseiras, aneis, pendentes e colares, a fin de que sexa propiciatoria polas nosas almas ante o Señor".

⁵¹Moisés e o sacerdote Elazar aceptaron deles o ouro: toda sorte de obxectos traballados con arte.

⁵²O total de ouro que presentaron ó Señor procedente dos xenerais e os centurións, foi 16.750 siclos.

⁵³Os soldados collérano cada un para si.

⁵⁴Moisés e o sacerdote Elazar tomaron o ouro dos xenerais e os centurións, e levárono á Tenda do Encontro, como lembranza dos fillos de Israel ante o Señor.