Read Biblia SEPT Números 32 Bible Online

Números 32 - Biblia SEPT bible

Números 32

¹Os fillos de Rubén e os fillos de Gad posuían numerosos rabaños, moi importantes, e tras contemplar o país de Iazer e o de Galaad, viron que o lugar era sitio propio para rabaños.

²Viñeron, pois, os fillos de Gad e os de Rubén e dixéronlles a Moisés, ó sacerdote Elazar e ós príncipes da comunidade:

³—"Atarot, Dibón, Iazer, Nimrah, Hexbón, Elaleh, Sibmah, Nebó e Beón,

⁴este país que o Señor fixo caer diante da comunidade de Israel é terra de rabaños, e os teus servos posúen rabaños.

⁵Se encontramos graza ós teus ollos, dános en posesión ós teus servos este territorio, non nos fagas atravesar o Xordán".

⁶Moisés, con todo, díxolles ós fillos de Gad e ós fillos de Rubén: —"Como van ir vosos irmáns á guerra e vosoutros ides quedar sentados?

⁷Por que queredes desanimar ós fillos de Israel, para que non pasen á terra que o Señor lles deu?

⁸Así fixeron vosos pais cando eu os mandei desde Cadex-Barnea a explorar o país.

⁹Subiron ata o val de Excol, e viron o país; logo desanimaron ós fillos de Israel para que non fosen ó país que o Señor lles dera.

¹⁰Aquel día acendeuse a ira do Señor, e xurou dicindo:

¹¹Os homes de vinte anos para arriba que subiron do Exipto non verán a terra que prometín con xuramento a Abraham, Isaac e Xacob, porque non me seguiron sen dúbidas,

¹²Agás Caleb, fillo de Iefuneh, o quenita, e Xosué, fillo de Nun, pois estes seguiron ó Señor sen desconfiar.

¹³Irouse o Señor contra Israel, e fíxoos andar errantes polo deserto corenta anos ata que fose extinta toda aquela xeración que fixera o mal na presenza do Señor.

¹⁴E velaí que agora vós levantádesvos no lugar de vosos pais para aumentardes aínda máis o furor da cólera do Señor contra Israel!

¹⁵Se deixades de o seguir, El alongará máis a vosa morada no deserto, e vós seredes a causa do exterminio de todo este pobo".

¹⁶Entón, aproximáronselle e dixeron: —"Edificaremos aquí currais para os nosos rabaños e cidades para os nosos fillos;

¹⁷mais nós ímonos armar de forza e iremos de seguida á fronte dos fillos de Israel, ata que os cheguemos a meter no seu lugar; e, mentres, os nosos fillos ficarán nas cidades fortificadas, por causa das incursións dos habitantes deste país.

¹⁸Non volveremos para as nosas casas ata que os fillos de Israel non teñan herdado cada un a súa herdanza;

¹⁹pois non temos de herdar nada con eles do lado de alá do Xordán, xa que nosoutros temos as nosas herdades na ribeira leste do Xordán".

²⁰Díxolles Moisés: —"Se facedes isto que decides, se vos armades de forza diante do Señor para ir á batalla,

²¹e todos os vosos homes de guerra atravesan o Xordán diante do Señor, ata que dea expulsado ós seus inimigos da súa presenza,

²²e todo o país fique sometido, e despois volvedes, entón ficaredes libres perante o Señor e perante Israel, e teredes esta terra en propiedade diante do Señor.

²³Mais se non obrades así, pecaredes contra o Señor, e sabede que o voso pecado caerá sobre vós.

²⁴Construídevos, pois, cidades para vosos fillos e currais para o voso rabaño, e facede o que acabades de prometer".

²⁵Entón os fillos de Gad e os fillos de Rubén contestáronlle a Moisés: —"Os teus servos farán conforme o meu Señor ordena.

²⁶Os nosos fillos, as nosas mulleres, os nosos rabaños e todo o noso gando ficarán aí, nas cidades de Galaad;

²⁷mais os teus servos, cada un dos que está equipado para a batalla, irán á guerra diante do Señor, segundo o que o meu señor dispón".

²⁸Entón Moisés deu orde acerca deles ó sacerdote Elazar, a Xosué, fillo de Nun, e ós xefes de familia das tribos israelitas.

²⁹Díxolles Moisés: —"Se os fillos de Gad e os fillos de Rubén pasan convosco o Xordán, equipados todos para a guerra diante do Señor, e o país é sometido ante vós, darédeslles a terra de Galaad en posesión;

³⁰mais se convosco non pasan equipados, terán a súa herdanza no medio de vós no país de Canaán".

³¹Os fillos de Gad e os fillos de Rubén contestaron: —"O que o Señor dixo ós teus servos, iso faremos.

³²Nós pasaremos equipados diante do Señor ó país de Canaán, pero a nosa herdanza tocaranos na ribeira de acá do Xordán".

³³Moisés deulles ós fillos de Gad e ós fillos de Rubén e a media tribo de Menaxés, fillo de Xosé, o reino de Sihón, rei dos amorreos, e o reino de Og, rei de Baxán, o país coas cidades incluídas dentro das súas fronteiras e as cidades do país situadas no contorno.

³⁴Os fillos de Gad reedificaron Dibón, Atarot, Aroer,

³⁵Atarot-Xofán, Iazer, Iogbohah,

³⁶Bet-Nimrah e Bet-Harán, cidades fortificadas e currais para o gando menor.

³⁷Os fillos de Rubén reedificaron Hexbón, Elalé, Quiriataim,

³⁸Nebó e Baal-Meón, cambiándolles o nome, e Sibmah, e puxéronlles nomes novos ás cidades que reedificaron.

³⁹Os fillos de Maquir, fillo de Menaxés, marcharon a Galaad e apoderáronse dela, botando ós amorreos que alí habitaban.

⁴⁰Moisés deu Galaad a Maquir, fillo de Menaxés, que se estableceu nela.

⁴¹Iair, fillo de Menaxés, foi e apoderouse das aldeas deles, e chamounas Aldeas de Iair.

⁴²Nóbah foi e apoderouse de Quenat e das súas aldeas do arredor, e chamounas Nóbah, conforme o seu nome.