Read Biblia SEPT Números 34 Bible Online

Números 34 - Biblia SEPT bible

Números 34

¹Díxolle o Señor a Moisés:

²—"Ordénalles ós fillos de Israel: Cando entredes no país de Canaán, este será a terra que vos tocará en posesión: o país de Canaán conforme os seus límites.

³Polo sur pertenceravos desde o deserto de Sin, seguindo a fronteira de Edom; esta fronteira meridional partirá desde o extremo do Mar Morto polo abrente;

⁴logo dará un rodeo cara ó sur, pola subida de Acrabim, e baixará ata o Sin, e chegará ó sur de Cadex-Barnea; logo irá saír a Hasar-addar e pasará a Asmón.

⁵Logo a fronteira torcerá desde Asmón cara ó Torrente de Exipto e terminará no mar.

⁶Por fronteira occidental teredes o Mar Mediterráneo: esta será para vós a fronteira ó oeste.

⁷Por fronteira septentrional teredes a seguinte: desde o Mar Mediterráneo trazaredes unha liña ata o monte Hor;

⁸desde o monte Hor trazaredes unha liña ata a entrada de Hamat, indo saír a fronteira ata Sedad.

⁹Logo a fronteira conducirá a Zifrón, terminando en Hasarenán. Tal será para vós a fronteira septentrional.

¹⁰Logo trazaredes unha liña como fronteira oriental desde Hasar-enán cara a Xefam.

¹¹A fronteira baixará desde Xefam ata Ha-Riblah, ó oriente de Ain, e seguirá baixando ata tocar a beira oriental do lago de Xenesaret;

¹²despois baixará a fronteira ata o Xordán, indo dar ó Mar Morto. Tal será para vós o país en todo o perímetro das súas fronteiras".

¹³Moisés ordenoulles entón ós fillos de Israel: —"Este é o país que tedes que vos repartir por sorte, e que o Señor mandou que se entregue para as nove tribos e media;

¹⁴pois a tribo dos fillos de Rubén, segundo as súas casas paternas, a tribo dos fillos de Gad, segundo as súas casas paternas e media tribo de Menaxés recibiron xa a súa herdade.

¹⁵As dúas tribos e media recibiron a súa herdanza alén do Xordán, de fronte de Iericó, para a banda do oriente".

¹⁶O Señor díxolle a Moisés:

¹⁷—"Estes son os nomes dos homes que vos repartirán a terra: O sacerdote Elazar e Xosué, fillo de Nun.

¹⁸Colleredes, ademais, un príncipe por cada unha das tribos para facer as partillas das herdanzas da terra.

¹⁹Velaquí os nomes deses homes: pola tribo de Xudá, Caleb, fillo de Iefuneh;

²⁰pola tribo dos fillos de Simeón, Samuel, fillo de Amihud;

²¹pola tribo de Benxamín, Elidad, fillo de Quislón;

²²pola tribo dos fillos de Dan, un príncipe: Buquí, fillo de Ioglí;

²³canto ós fillos de Xosé, pola tribo dos fillos de Menaxés, un príncipe: Haniel, fillo de Efod;

²⁴e pola tribo dos fillos de Efraím, un príncipe: Quemuel, fillo de Xiftán;

²⁵pola tribo dos fillos de Zebulón, un príncipe: Elisafán, fillo de Parnac;

²⁶pola tribo dos fillos de Isacar, un príncipe: Paltiel, fillo de Azán;

²⁷pola tribo dos fillos de Axer, un príncipe: Ahihud, fillo de Xelomí,

²⁸e pola tribo dos fillos de Naftalí, un príncipe: Pedahel, fillo de Amihud".

²⁹Tales son os que o Señor designou para repartiren en herdanza o país de Canaán entre os fillos de Israel.