Read Biblia SEPT Números 4 Bible Online

Números 4 - Biblia SEPT bible

Números 4

²—"Fai o censo dos descendentes de Quehat, entre os fillos de Leví, por familias, segundo as súas casas patriarcais;

³desde trinta anos para arriba ata a idade de cincuenta anos, todos cantos poidan ir á guerra, e que se encarguen do servizo litúrxico na Tenda do Encontro.

⁴Estes serán os servizos dos fillos de Quehat na Tenda do Encontro: as tarefas máis sagradas.

⁵Cando se teña que cambiar o campamento, virán Aharón e seus fillos e farán baixar a cortina de protección e taparán con ela a Arca da Alianza.

⁶E poranlle enriba a cuberta de pel de teixugo e estenderán por riba un pano todo de púrpura violeta e logo colocarán os varais.

⁷Cubrirán a mesa da proposición cun pano de púrpura violeta e pousarán por riba as fontes, os pratos, as cuncas e as copas de libacións; e o pan perpetuo.

⁸Estenderán por riba de todo isto un pano escarlata, que cubrirán cunha cuberta de pel de teixugo, e colocaranlle os varais de transporte.

⁹Entón collerán o pano de púrpura violeta e envolverán o candelabro do alumado e as súas lámpadas, as súas tenaces e pinzas e todos os demais vasos de aceite, dos que se usan no servizo do candelabro.

¹⁰Envolverán todo nun coiro fino e pousarano sobre os varais.

¹¹Enriba do altar de ouro estenderán un pano de púrpura violeta e taparano cunha pel de teixugo e colocarano nos varais.

¹²Collerán todos os utensilios que se usan no servizo do santuario, colocaranos no pano de púrpura violeta, taparanos coa pel de teixugo e colocaranos sobre os varais.

¹³Limparán as cinsas do altar e estenderán enriba o pano de púrpura.

¹⁴Sobre el porán todos os utensilios usados no servizo: os braseiros, as tenaces, e os tridentes, os garfos e as pás, e todos os outros utensilios do altar, e estenderán enriba unha pel de teixugo e colocaranlle os varais.

¹⁵Cando Aharón e os seus fillos dean envolto todos os obxectos do santuario con todos os seus utensilios sagrados, para pór en marcha o campamento, virán os fillos de Quehat para levalo, pero non poderán tocar nada sagrado, pois morrerían. Este é o cargo que teñen os fillos de Quehat, referente á Tenda do Encontro.

¹⁶O cargo de Elazar, fillo de Aharón, sacerdote, estará o aceite para alumar, o incenso para o recendo da ofrenda perpetua, o óleo da unción; o coidado de todo o Tabernáculo e de todas as cousas que hai nel, tanto o tocante ó santuario coma ós seus utensilios".

¹⁷Díxolles o Señor a Moisés e Aharón:

¹⁸—"Non deixedes desaparecer as familias de Quehat do medio dos demais levitas.

¹⁹Para que vivan e non morran, habedes proceder con eles deste xeito: cando teñan que se achegar ás cousas sagradas do santuario, Aharón e seus fillos entrarán e sinalaranlles cadanseu servizo e cargo.

²⁰Non entren eles para ver as cousas sagradas, nin sequera cando as están tapando, porque morrerían".

²¹Díxolle o Señor a Moisés:

²²—"Fai tamén o censo dos fillos de Guerxón por familias e casas patriarcais.

²³Desde os de trinta anos para arriba ata os de cincuenta anos, e anota a todos os que sexan capaces para o servizo da Tenda do Encontro.

²⁴Estes son os cargos das familias de Guerxón e os seus traballos:

²⁵levarán as cortinas do Tabernáculo e da Tenda do Encontro, as súas cubertas e os coiros de teixugo que se usan para cubrilos por riba, a cortina da entrada da Tenda do Encontro,

²⁶As cortinas do adro e as da entrada da porta do adro, os panos cos que se cobre o Tabernáculo e o altar por todo o arredor, as cordas e todos os demais utensilios para o seu servizo, e ensinaraslles o que teñen que facer con eles.

²⁷Conforme as ordes de Aharón e de seus fillos, distribuiranse os cargos dos fillos de Guerxón con todas as funcións e servizos correspondentes, que lles encomendaredes en cada caso.

²⁸Estes son os cargos dos fillos de Guerxón na Tenda do Encontro. No referente ás gardas, estarán baixo a autoridade de Itamar, fillo do sacerdote Aharón.

²⁹Censarás os fillos de Merarí, por familias e casas patriarcais.

³⁰Farás o censo dos varóns de trinta anos para arriba ata os cincuenta anos, todos os que sexan capaces para o servizo da Tenda do Encontro.

³¹Estes son todos os traballos dos que se encargarán na Tenda do Encontro: levarán as táboas do Tabernáculo, os seus varais, as columnas, as súas bases,

³²e tamén as columnas que están ó redor do adro coas súas bases, as súas estacas e as cordas con todos os accesorios correspondentes. Apuntaredes co nome deles os utensilios que teñen que gardar por cargo.

³³Estes son os traballos que lles corresponden ós fillos das familias de Merarí, referentes todos ós servizos da Tenda do Encontro, baixo a autoridade de Itamar, fillo do sacerdote Aharón".

³⁴Moisés, Aharón e os príncipes da comunidade fixeron o censo dos fillos de Quehat por familias e casas patriarcais.

³⁵De trinta anos para arriba ata os cincuenta, todos os que eran capaces para o servizo na Tenda do Encontro.

³⁶Os censados por familias sumaron 2.750.

³⁷Estes son os censados da familia de Quehat que Moisés e Aharón dedicaron ó servizo da Tenda do Encontro conforme as ordes do Señor, baixo a autoridade de Moisés.

³⁸Os fillos de Guerxón anotados por familias e casas patriarcais,

³⁹desde a idade de trinta anos para arriba ata os cincuenta, todos os que tiñan de ingresar no servizo da Tenda do Encontro,

⁴⁰contados por familias e casas patriarcais, foron 2.630 en total.

⁴¹Estes son os contados por familias de entre os fillos de Guerxón, todos os que servían na Tenda do Encontro, que censaron Moisés e Aharón segundo as ordes do Señor.

⁴²Os fillos de Merarí anotados por familias e casas patriarcais,

⁴³desde trinta anos para arriba ata a idade de cincuenta anos, todos os que tiñan que ingresar no servizo da Tenda do Encontro,

⁴⁴contados por familias, sumaron en total, 3.200.

⁴⁵Estes son os censados da familia de Merarí, que anotaron Moisés e Aharón seguindo as ordes do Señor, baixo a autoridade de Moisés.

⁴⁶O total dos censados por Moisés, Aharón e os xefes de familia de Israel, dos descendentes de Leví por familias e casas patriarcais,

⁴⁷de trinta anos para arriba ata cincuenta, todos os que tiñan que ingresar no servizo da Tenda do Encontro da comunidade, segundo os respectivos cargos,

⁴⁸sumaron 8.580.

⁴⁹Conforme as ordes do Señor, Moisés censounos un por un, segundo os servizos que debían desempeñar. Os designados foron aqueles que o Señor lle mandara a Moisés.