Read Biblia SEPT Números 7 Bible Online

Números 7 - Biblia SEPT bible

Números 7

¹E aconteceu que o día en que Moisés acabou de construír o Tabernáculo e unxilo e mais consagralo con todos os seus utensilios, consagrou tamén o altar con todos os seus utensilios,

²os príncipes de Israel presentaron unha ofrenda, como cabezas das súas casas patriarcais, isto é, os que eran xefes cando fixeran o censo.

³Trouxeron como ofrenda ó Señor seis carros cubertos e doce bois, un carro por cada un dos xefes e un boi por cada un, e presentáronos diante do Tabernáculo.

⁴O Señor díxolle a Moisés:

⁵—"Recibe estas cousas, para que se dediquen ó servizo da Tenda do Encontro, e entrégallelas ós levitas, a cada un conforme o seu oficio".

⁶Recibiu Moisés os carros e os bois e déullelos ós levitas.

⁷Dous carros e catro bois déullelos ós fillos de Guerxón, conforme ó seu servizo.

⁸Os fillos de Merarí entregoulles catro carros e oito bois, tamén de acordo coas necesidades do seu oficio, baixo a autoridade de Itamar, fillo do sacerdote Aharón.

⁹Os fillos de Quehat, non obstante, non lles deu nin carro nin bois, porque teñen ó seu cargo transportar nos ombros as cousas máis santas.

¹⁰Os xefes presentaron as súas ofrendas pola dedicación do altar, no día en que foi unxido: cada un presentou as súas ofrendas diante do altar.

¹¹E díxolle o Señor a Moisés: —"Que os príncipes presenten a súa ofrenda para a dedicación do altar, un cada día".

¹²A orde de presentación foi esta: o primeiro día fixo a ofrenda Nahxón, fillo de Aminadab, pola tribo de Xudá.

¹³A súa ofrenda foi: unha fonte de prata, que pesaba cento trinta siclos e unha artesa de prata de setenta siclos de peso, conforme o siclo do santuario, ámbalas dúas cheas de flor de fariña amasada con aceite para a oblación;

¹⁴unha cunca toda de ouro de dez siclos, chea de incenso;

¹⁵un xovenco, un carneiro e un año dun ano para o holocausto;

¹⁶un chibo para o sacrificio de expiación;

¹⁷e para o sacrificio de comuñón dous bois, cinco carneiros, cinco chibos e cinco años dun ano. Toda esta foi a ofrenda de Nahxón, fillo de Aminadab.

¹⁸O segundo día fixo a ofrenda Natanael, fillo de Suar, príncipe de Isacar.

¹⁹Velaquí a súa ofrenda: unha fonte de prata de cento trinta siclos de peso e unha artesa de prata de setenta siclos de peso, conforme o siclo do santuario, ámbalas dúas cheas de flor de fariña amasada con aceite para a oblación;

²⁰unha cunca toda de ouro de dez siclos, chea de incenso;

²¹un xovenco, un carneiro, un año dun ano para o holocausto,

²²un chibo para o sacrificio expiatorio polo pecado;

²³e para o sacrificio de comuñón, dous bois, cinco carneiros, cinco chibos gordos, cinco años dun ano. Tal foi a ofrenda de Natanael, fillo de Suar.

²⁴O terceiro día ofrendou Eliab, fillo de Helón, príncipe dos fillos de Zebulón.

²⁵A súa ofrenda foi: unha fonte de prata de cento trinta siclos de peso, unha artesa de prata de setenta siclos, conforme o siclo do santuario, ámbalas dúas cheas de flor de fariña amasada con aceite para a oblación;

²⁶unha cunca de ouro de dez siclos, chea de incenso;

²⁷un xovenco, un carneiro, un año dun ano para o holocausto,

²⁸un chibo para o sacrificio polo pecado;

²⁹e para o sacrificio de comuñón dous bois, cinco carneiros, cinco chibos gordos, cinco años dun ano. Esta foi a ofrenda de Eliab, fillo de Helón.

³⁰O día cuarto presentou Elisur, fillo de Xedeur, príncipe dos fillos de Rubén, a súa ofrenda.

³¹A súa ofrenda foi: unha fonte de prata de cento trinta siclos de peso, unha artesa de prata de setenta siclos, conforme o siclo do santuario, ámbalas dúas cheas de flor de fariña amasada con aceite para a oblación;

³²unha cunca de ouro de dez siclos chea de incenso;

³³un xovenco, un carneiro dun ano para o holocausto,

³⁴un chibo para o sacrificio polo pecado;

³⁵e para o sacrificio de comuñón dous bois, cinco carneiros, cinco chibos gordos e cinco años dun ano. Esta foi toda a ofrenda de Elisur, fillo de Xedeur.

³⁶O día quinto ofrendou Selumiel, fillo de Surixadai, príncipe dos fillos de Simeón.

³⁷A súa ofrenda foi: unha fonte de prata de cento trinta siclos de peso, conforme ó siclo do santuario, unha artesa de prata de setenta siclos de peso, conforme o siclo do santuario, ámbalas dúas cheas de flor de fariña, amasada con aceite para a oblación;

³⁸unha cunca de ouro de lei de dez siclos, chea de incenso;

³⁹un xovenco, un carneiro, un año dun ano para o holocausto;

⁴⁰un chibo para o sacrificio polo pecado;

⁴¹e para o sacrificio de comuñón dous bois, cinco carneiros, cinco años dun ano. Toda esta foi a ofrenda de Xelumiel, fillo de Surixadai.

⁴²O día sexto, Eliasaf, fillo de Deuel, príncipe dos fillos de Gad, fixo a súa ofrenda.

⁴³A súa ofrenda foi: unha fonte de prata de cento trinta siclos de peso e unha artesa de prata de setenta siclos, conforme o siclo do santuario, ámbalas dúas cheas de flor de fariña amasada con aceite para a oblación;

⁴⁴unha cunca de ouro de dez siclos, chea de incenso;

⁴⁵un xovenco, un carneiro, un año dun ano para o holocausto;

⁴⁶dous bois, cinco carneiros, cinco chibos gordos e cinco años dun ano para o sacrificio de comuñón.

⁴⁷Toda esta foi a ofrenda de Eliasaf, fillo de Deuel.

⁴⁸O día sétimo, Elixamá, fillo de Amihud, príncipe dos fillos de Efraím,

⁴⁹fixo a súa ofrenda, que foi: unha fonte de prata de cento trinta siclos de peso, unha artesa de prata de setenta siclos, conforme ó siclo do santuario, ámbalas dúas cheas de flor de fariña amasada con aceite para a oblación;

⁵⁰unha cunca de ouro de dez siclos, chea de incenso;

⁵¹un xovenco, un carneiro e un año dun ano para o holocausto;

⁵²un chibo para o sacrificio polo pecado;

⁵³dous bois, cinco carneiros, cinco chibos gordos e cinco años dun ano para o sacrificio de comuñón. Esta foi a ofrenda de Elixamá, fillo de Amihud.

⁵⁴O día oitavo, o príncipe dos fillos de Menaxés, Gamaliel, fillo de Pedahsur,

⁵⁵presentou a súa ofrenda, que foi: unha fonte de prata de cento trinta siclos de peso, unha artesa de prata de setenta siclos, conforme o siclo do santuario, ámbalas dúas cheas de flor de fariña, amasada en aceite, para a oblación;

⁵⁶unha cunca de ouro de dez siclos, chea de incenso;

⁵⁷un xovenco, un carneiro e un año dun ano, para o holocausto;

⁵⁸un chibo para o sacrificio polo pecado;

⁵⁹para o sacrificio de comuñón dous bois, cinco carneiros, cinco años dun ano. Toda esta foi a ofrenda de Gamaliel, fillo de Pedahsur.

⁶⁰O día noveno o príncipe dos fillos de Benxamín, Abidán, fillo de Guideón,

⁶¹fixo a súa ofrenda: unha fonte de prata de cento trinta siclos de peso, unha artesa de prata de setenta siclos, conforme o siclo do santuario, ámbalas dúas cheas de flor de fariña, amasada en aceite, para a oblación;

⁶²unha cunca de ouro de dez siclos chea de incenso;

⁶³un xovenco, un carneiro e un año dun ano para o holocausto;

⁶⁴un chibo para o sacrificio polo pecado;

⁶⁵e para o sacrificio de comuñón dous bois, cinco carneiros, cinco chibos gordos e cinco años dun ano. Esta foi a ofrenda de Abidán, fillo de Guideón.

⁶⁶O décimo día, o príncipe dos fillos de Dan, Ahiézer, fillo de Amixadai,

⁶⁷presentou a súa ofrenda: unha fonte de prata de cento trinta siclos de peso, unha artesa de prata de setenta siclos, conforme ó siclo do santuario, ámbalas dúas cheas de flor de fariña, amasada en aceite, para a oblación;

⁶⁸unha cunca de ouro de dez siclos, chea de incenso;

⁶⁹un xovenco, un carneiro e un año dun ano para o holocausto;

⁷⁰un chibo para o sacrificio polo pecado;

⁷¹e para o sacrificio de comuñón, dous bois, cinco carneiros, cinco chibos gordos e cinco años dun ano. Esta foi a ofrenda de Ahiézer, fillo de Amixadai.

⁷²O undécimo día, o príncipe dos fillos de Axer, Paguiel, fillo de Ocrán,

⁷³presentou a súa ofrenda: unha fonte de prata, de cento trinta siclos de peso, unha artesa de prata de setenta siclos, conforme o siclo do santuario, ámbalas dúas cheas de flor de fariña, amasada con aceite, para a oblación;

⁷⁴unha cunca de ouro de dez siclos, chea de incenso;

⁷⁵un xovenco, un carneiro e un año dun ano para o holocausto;

⁷⁶un chibo para o sacrificio polo pecado;

⁷⁷para o sacrificio da comuñón dous bois, cinco carneiros, cinco chibos gordos e cinco años dun ano. Esta foi a ofrenda de Paguiel, fillo de Ocrán.

⁷⁸O duodécimo día, o príncipe dos fillos de Naftalí, Ahirá, fillo de Enán,

⁷⁹presentou a súa ofrenda: unha fonte de prata de cento trinta siclos de peso, unha artesa de prata de setenta siclos, conforme ó siclo do santuario, ámbalas dúas cheas de flor de fariña amasada en aceite para a oblación;

⁸⁰unha cunca de ouro de dez siclos, cheo de incenso;

⁸¹un xovenco, un carneiro e un año dun ano para o holocausto;

⁸²un chibo para o sacrificio polo pecado;

⁸³e para o sacrificio de comuñón dous bois, cinco carneiros, cinco chibos gordos e cinco años dun ano. Esta foi a ofrenda de Ahirá, fillo de Enán.

⁸⁴As ofrendas presentadas polos príncipes de Israel con motivo da dedicación do altar, cando foi consagrado, foron estas: fontes de prata, doce; artesas de prata, doce; cuncas de ouro, doce.

⁸⁵Cada fonte de prata pesaba cento trinta siclos e cada artesa de prata setenta siclos: en total a prata das fontes e bacías foi de dous mil catrocentos siclos de prata, conforme o siclo do santuario.

⁸⁶As doce cuncas de ouro cheas de incenso, todas elas de ouro de lei, en siclos do santuario sumaron un total de cento vinte siclos.

⁸⁷A suma dos animais para o holocausto: doce xovencos, doce carneiros, doce años dun ano, coas súas oblacións correspondentes; e para o sacrificio polo pecado, doce chibos.

⁸⁸O total dos animais para o sacrificio de comuñón foi de vinte e catro xovencos, sesenta carneiros, sesenta chibos gordos, e sesenta años dun ano. Todo isto con motivo da dedicación do altar despois da súa consagración.

⁸⁹Cando Moisés entraba na Tenda do Encontro para falar con Deus, escoitaba a voz que lle falaba desde o propiciatorio, que estaba sobre a Arca do Testemuño, entre os dous querubíns: faláballe desde alí.