Read Biblia SEPT Axeo 1 Bible Online

Axeo 1 - Biblia SEPT bible

Axeo 1

¹No ano dous do rei Darío, no mes seis, o día primeiro do mes, veu a palabra do Señor por medio do profeta Axeo a Zerubabel, fillo de Xealtiel, gobernador de Xudá, e a Iehoxúa, fillo de Iehosadac, o sumo sacerdote, nestes termos:

²Así fala o Señor, Deus dos Exércitos: "Este pobo anda dicindo: Aínda non chegou o momento de reconstruír o templo do Señor".

³Pero a palabra do Señor veu por medio do profeta Axeo nestes termos:

⁴"É xa tempo para vós de habitardes en casas ben rematadas, mentres este templo está en ruínas?"

⁵Pois agora, así fala o Señor dos Exércitos: "Considerade ben o voso comportamento:

⁶Sementastes para recollerdes abundantemente, pero recollestes pouco, comestes sen fartarvos, bebestes sen saciarvos do licor, vestístesvos sen sentirdes calor con iso, e o xornaleiro recibiu o xornal en saco roto".

⁷Así fala o Señor dos Exércitos: "Considerade ben o voso comportamento:

⁸Rubide ó monte, traede madeira e reconstruíde o templo, que eu me compraza nel e nel mostre a miña gloria —di o Señor—.

⁹Esperastes facer moito: mirade que pouco; trouxéstelo para casa, pero eu boteino ó vento. Por que isto? —é o Señor dos Exércitos quen fala—. Por culpa do meu templo que está en ruínas, mentres vós vos compracedes cada un na súa casa.

¹⁰Por isto, por culpa vosa, o ceo negou a chuvia e a terra negou o seu froito.

¹¹Si, eu convoquei a seca sobre a terra e os montes, sobre o trigo, o viño e o aceite, sobre o que a terra fai brotar, sobre os homes e os animais e sobre todos os traballos das mans".

¹²Zerubabel, fillo de Xealtiel, o sumo sacerdote Iehoxúa, fillo de Iehosadac, e todo o resto do pobo, fixéronlle caso á voz do Señor, o seu Deus, e ás palabras do profeta Axeo, tal como encomendara o Señor, Deus deles, e o pobo respectou a presenza do Señor.

¹³Axeo, o mensaxeiro do Señor, faloulle ó pobo conforme a mensaxe do Señor: "Eu estou convosco" —é o Señor quen fala—.

¹⁴O Señor espertou o espírito de Zerubabel, fillo de Xealtiel, gobernador de Xudá, e o espírito do sumo sacerdote, Iehoxúa, fillo de Iehosadac, e o espírito do resto do pobo. Puxéronse á obra no templo do Señor dos Exércitos, o seu Deus.

¹⁵No ano segundo de rei Darío