Read Biblia SEPT Zacarías 10 Bible Online

Zacarías 10 - Biblia SEPT bible

Zacarías 10

¹Pedídelle ó Señor a chuvia no tempo da primavera. O Señor produce os tronos e a chuvia abondosa, daralle a cada un a herba no campo.

²Os terafíns anuncian falsidade e os adiviños ven mentiras, anuncian soños ilusos, consolan con falsidades. Velaí por que o pobo anda descamiñado coma un rabaño, está aflixido por non ter pastor.

³A miña ira incéndiase contra os pastores, e pediralles contas ós carneiros-guías. Si, o Señor dos Exércitos visitará o seu rabaño, a casa de Xudá, e converterao no seu cabalo esplendoroso de guerra.

⁴De Xudá sairá o teito das tendas, del as caravillas, del os arcos de guerra, del sairán todos os xefes. Xuntos

⁵estarán os heroes que na guerra esmagan coma a lama dos camiños. Si, loitarán, porque o Señor está con eles, pero os que montan a cabalo quedarán avergonzados.

⁶Eu fortalecerei a casa de Xudá e salvarei a casa de Xosé. Si, fareinos volver, porque teño compaixón deles e serán coma se eu nunca os rexeitase, pois eu son o Señor, o seu Deus, e heinos de escoitar.

⁷Os de Efraím serán coma heroes, e o seu corazón alegrarase coma do viño, e os fillos verano e alegraranse, e o seu corazón brincará de ledicia polo Señor.

⁸Chamareinos co asubío e xuntareinos: Si, rescatareinos e multiplicaranse coma antes.

⁹Sementareinos por entre as nacións, e desde lonxe se lembrarán de min: criarán aí os seus fillos, pero estes volverán.

¹⁰Fareinos volver do país de Exipto, e recadareinos desde Asiria, traereinos ó país de Galaad e ó Líbano, tantos, que non haberá sitio para eles.

¹¹O Señor cruzará a marusía e petará nas ondas e secarán todas as profundidades do Nilo. Humillará a soberbia de Asiria e retirará o cetro de Exipto.

¹²Entón, fortalecereinos de parte do Señor, e camiñarán coa forza do seu Nome —é o Señor quen fala—.