Read Biblia SEPT Zacarías 7 Bible Online

Zacarías 7 - Biblia SEPT bible

Zacarías 7

¹No ano catro do rei Darío, veulle a palabra do Señor a Zacarías, o día catro do noveno mes de Casleu.

²Betel encargou a Saréser e ó oficial do rei e ós seus homes de iren implorar a presenza favorable do Señor,

³e dicirlles ós sacerdotes que había no templo do Señor dos Exércitos e ós profetas: "Hei de seguir facendo a lamentación no quinto mes, privándome de todo tal e como o veño facendo desde hai tantos anos?".

⁴Entón veume a palabra do Señor nestes termos:

⁵"Fálalles a todo o pobo do país e ós sacerdotes nestes termos: Vós cando xaxuades e facedes lamentación no quinto e no sétimo mes, xa hai disto setenta anos, practicades o xaxún precisamente por min?

⁶Cando comedes e bebedes, non o facedes por vós, comellóns e bebedores?

⁷Acaso non coñecedes as palabras que o Señor proclamou por medio dos antigos profetas, cando Xerusalén estaba habitada e vivía tranquila o mesmo cás cidades do seu arredor cando o Négueb e a Xefelah estaban habitados?"

⁸Veulle a palabra do Señor a Zacarías nestes termos:

⁹"Así fala o Señor dos Exércitos: Sentenciade sentencia fiel. Practicade cada un co seu irmán a bondade e a misericordia.

¹⁰A viúva e ó orfo, ó emigrante e ó pobre, non os oprimades. Non matinedes nos vosos corazóns o mal, cada un contra o seu irmán".

¹¹Pero vós rexeitastes facer caso, puxestes ombro rebelde e endurecestes os vosos oídos para non escoitardes

¹²e volvestes o voso corazón un diamante, para non facerdes caso desta lei e destas palabras, que o Señor dos Exércitos enviou mediante o seu Espírito por obra dos antigos profetas. Por isto houbo grande carraxe de parte do Señor dos Exércitos.

¹³E sucedeu que, o mesmo que eu chamaba e vós non faciades caso, así tamén eles clamaban e eu non lles facía caso —di o Señor dos Exércitos—.

¹⁴Eu espalleinos entre as nacións que non coñecían, e o país quedou feito unha desolación detrás deles, sen haber quen o cruzase nin o habitase. Deste xeito converteron un país de delicias nunha desolación".