Read Biblia SEPT 1 Macabeos 16 Bible Online

1 Macabeos 16 - Biblia SEPT bible

1 Macabeos 16

¹Xoán subiu de Guézer e comunicoulle a seu pai Simón o que Cendebeo andaba a facer.

²Simón chamou ós seus dous fillos máis vellos, Xudas e Xoán, e díxolles: —"Eu e mais meus irmáns e mais toda a miña familia combatemos ós inimigos de Israel desde que eramos mozos ata hoxe, e co noso esforzo conseguimos liberar a Israel.

³Eu xa vou vello, pero vós, grazas a Deus, estades na idade mellor. Ocupade o meu posto e mais o de meu irmán, e ide loitar pola patria. Que a axuda do Ceo vaia convosco".

⁴Escolleron vinte mil do país entre guerreiros valentes e xinetes, e partiron contra Cendebeo. Pasaron a noite en Modín,

⁵e pola mañanciña erguéronse e avanzaron cara a terra cha; entón saíulles ó encontro un poderoso exército de infantería e cabalería. Só os separaba un torrente.

⁶Xoán e as súas tropas dispuxéronse a atacar. Xoán, ó decatarse de que as súas tropas tiñan medo a pasar o torrente, atravesouno el primeiro, e as súas tropas, ó velo, pasaron atrás del.

⁷Dividiu a súa xente en dous corpos, e colocou no medio ós de a cabalo, porque os xinetes inimigos eran moitísimos.

⁸Soaron as trompetas e Cendebeo e o seu exército foron vencidos; moitos deles caeron feridos e os demais fuxiron á fortaleza.

⁹Tamén foi ferido Xudas, o irmán de Xoán. Xoán perseguiunos ata a cidade de Cedrón, reconstruída por Cendebeo.

¹⁰Os inimigos fuxiron para as torres do campo de Axdod, pero Xoán pegoulles lume, e así morreron arredor de dous mil contrarios. Despois volveu vitorioso a Xudá.

¹¹Tolomeo, fillo de Abubos, fora nomeado gobernador da terra cha de Iericó. Tiña moita prata e ouro,

¹²porque era o xenro do sumo sacerdote.

¹³Pero tanto se ensoberbeceu que quería apoderarse de todo o país, e así decidiu matar traizoeiramente a Simón e ós seus fillos.

¹⁴Simón visitaba daquela as cidades do país para ver como ían os asuntos, e baixou a Xericó cos seus fillos Matatías e Xudas; era no undécimo mes, ou sexa no mes de Xebat, do ano cento setenta e sete.

¹⁵O fillo de Abubos recibiunos arteiramente na fortaleza de Doc, construída por el mesmo. Ofreceulles un gran banquete, pero deixou escondidos uns poucos homes.

¹⁶Cando Simón e os seus fillos estaban bébedos, Tolomeo fixo un sinal; entón os escondidos saíron coas armas e botáronse contra eles, e mataron a Simón, ós seus dous fillos e a algúns dos seus acompañantes.

¹⁷Cometeu unha gran traizón devolvendo mal por ben.

¹⁸Despois Tolomeo escribiulle ó rei dicíndolle o que pasara e pedíndolle que lle mandase tropas de auxilio para apoderarse do país e das súas cidades.

¹⁹Mandou tamén algúns a Guézer para que matasen a Xoán. Escribiu cartas ós oficiais do exército para que se pasasen ó seu bando, e prometeulles prata, ouro e outros regalos.

²⁰Enviou outro grupo para que ocupasen Xerusalén e o monte do templo.

²¹Pero alguén foi correndo a Guézer e comunicoulle a Xoán que mataran a seu pai e a seus irmáns e que mandaran matalo a el tamén.

²²O saber isto, Xoán quedou estarrecido; mandou prender ós que o viñan matar e matounos, pois sabía as súas intencións.

²³Os demais feitos do Xoán, as fazañas que levou a cabo, os muros que ergueu, e todas as súas obras,

²⁴pódense ver escritas nos anais do seu pontificado, desde o día en que sucedeu a seu pai como Sumo Sacerdote.