Read Biblia SEPT 1 Macabeos 8 Bible Online

1 Macabeos 8 - Biblia SEPT bible

1 Macabeos 8

¹Chegou ós oídos de Xudas a sona dos romanos: eran moi poderosos, mostrábanse benévolos con todos os seus aliados e facían pactos de amizade con cantos acudían a eles.

²Contáronlle tamén as guerras e as proezas que fixeran na Galia, como a conquistaran e agora tíñalles que pagar tributos.

³E todo o que fixeran en España, para se apoderaren das minas de prata e de ouro que alí hai;

⁴como mantiñan o seu dominio naquela terra con paciencia e prudencia, e iso que estaba moi lonxe do seu país. Tamén lle falaron da derrota que lles meteran ós reis que desde moitas partes da terra os atacaran; foi tan grande que os demais xa lles pagaban tributos anualmente.

⁵Tamén derrotaron e someteron a Filipo, a Perseo, rei de Macedonia, e a todos os que se levantaron contra eles.

⁶E o mesmo fixeron con Antíoco, rei de Asia, que foi á guerra contra eles con cento vinte elefantes, cabalería, carros e unha infantería moi numerosa;

⁷collérono vivo e obrigárono a el e ós seus sucesores a pagar grandes tributos, amais da entrega de reféns e da cesión

⁸das súas mellores provincias, India, Media e Lidia; eles despois pasáronllas ó rei Eumenes.

⁹Tamén os gregos decidiron atacalos e acabar con eles.

¹⁰Pero cando os romanos se informaron do plano, mandaron contra eles un só xeneral; combateunos e matou a moitos dos gregos, levou presas ás mulleres e ós fillos, rapinou todos os seus bens, apoderouse das terras, derrubou as fortalezas e fíxoos escravos, e así están aínda hoxe.

¹¹Destruíron e escravizaron ós demais reinos e illas que se lles opuxeron.

¹²Pero son fieis ós seus amigos e cos que confían neles. Dominaron ós reis veciños e ós de lonxe. Todos os que oen falar deles, lles collen medo.

¹³Reinan aqueles a quen axudan eles a reinar, destronan ós que queren. Teñen un poder enorme.

¹⁴Entre eles ninguén leva coroa nin se viste de púrpura para engrandecerse con ela.

¹⁵Formaron un Senado, e a cotío tres centos vinte senadores miran polo bo goberno do pobo.

¹⁶Cada ano entregan o mando e o goberno de todos os seus dominios a un só home, e todos lle obedecen sen envexas nin rivalidades.

¹⁷Xudas escolleu a Eupólemo, fillo de Xoán de Hacós, e a Iasón, fillo de Elazar, e mandounos a Roma para firmar un tratado de amizade e alianza,

¹⁸coa intención de saír do xugo dos gregos, pois vían que estes querían escravizar a Israel.

¹⁹Chegaron a Roma, a viaxe fora moi longa. Entraron no Senado e dixeron:

²⁰—"Xudas, o Macabeo, seus irmáns e o pobo xudeu mándannos para facer convosco un tratado de amizade e de alianza, de xeito que de agora en adiante nos contedes entre os vosos amigos e aliados".

²¹A petición foi ben acollida.

²²Velaquí a copia da carta que escribiron en láminas de bronce e enviaron a Xerusalén, para que alí ficase como garantía do tratado de paz e alianza:

²³—"Prosperidade sen fin para romanos e xudeus, na terra e no mar, e que a espada inimiga estea lonxe deles!

²⁴Se alguén lles declara a guerra ós romanos ou a algún dos seus aliados en calquera parte do seu imperio,

²⁵os xudeus loitarán con eles decididamente, segundo o pidan as circunstancias.

²⁶Os inimigos nin lles darán nin fornecerán víveres, armas, cartos nin barcos. É decisión dos romanos. Gardarán estes compromisos sen ningunha compensación.

²⁷Do mesmo xeito, se alguén lles declara a guerra ós xudeus, os romanos loitarán con eles decididamente, segundo o pidan as circunstancias.

²⁸Os inimigos non lles darán víveres, armas, cartos nin barcos. É decisión dos romanos. Gardarán este compromiso con toda lealdade.

²⁹Estas son as condicións que os romanos poñen para pactar cos xudeus.

³⁰Se máis adiante algún dos pactantes quere engadir ou retirar algo, hase facer chegando a un acordo; e o engadido ou retirado será obrigatorio.

³¹No que se refire ó mal que o rei Demetrio lles fixo, xa lle escribimos o seguinte: Por que asoballas con tanta dureza ós nosos amigos e aliados?

³²Se se nos volven queixar de ti, defenderemos os seus dereitos atacándote por terra e por mar".