Read Biblia SEPT 2 Macabeos 1 Bible Online

2 Macabeos 1 - Biblia SEPT bible

2 Macabeos 1

¹Os irmáns xudeus de Xerusalén e de Xudá saúdan ós irmáns de Exipto e deséxanlles paz e prosperidade.

²Que Deus vos encha das súas bendicións e que se acorde da alianza que fixo con Abraham, Isaac e Xacob, fieis servos seus.

³Que vos dea a todos un bo corazón para adoralo e cumprir os seus mandamentos animosamente e de boa gana.

⁴Que abra o voso corazón á súa Lei e ós seus preceptos, e que vos conceda a paz.

⁵Que escoite as vosas oracións, se reconcilie convosco e non vos abandone nos momentos de desgraza.

⁶Velaí a nosa oración por vós.

⁷Durante o reinado de Demetrio, no ano cento sesenta e nove, nós, os xudeus escribímosvos: —"Envoltos nas desgrazas e na persecución que estabamos sufrindo naqueles anos, cando Iasón e os seus partidarios traizoaron a causa da terra santa e do reino,

⁸incendiaron o pórtico do templo e verteron sangue inocente, nós acudimos ó Señor e El escoitounos. Ofrecémoslle un sacrificio e flor de fariña, acendemos as lámpadas e presentamos os pans".

⁹Polo tanto celebrade vós agora a festa das Tendas do mes de Kisleu. Ano cento oitenta e oito.

¹⁰Os habitantes de Xerusalén e de Xudá, o senado e Xudas saúdan e desexan prosperidade a Aristóbulo, preceptor do rei Tolomeo, da familia dos sacerdotes consagrados, e ós de Exipto.

¹¹Dámoslle moitas grazas a Deus por ternos salvado de grandes perigos e por guiarnos na loita contra o rei,

¹²pois de certo foi El quen desfixo ós que fixeron a guerra contra a cidade santa.

¹³E así cando o seu xeneral, acompañado dun exército que parecía invencible, chegou a Persia, foi esnaquizado no templo de Nanea, grazas a unha trampa que lle armaron os sacerdotes de Nanea.

¹⁴Co motivo de casar coa deusa Nanea, Antíoco entrou no templo cos seus amigos para apoderarse das súas inmensas riquezas coma dote.

¹⁵Cando os sacerdotes de Nanea lle trouxeron e mostraron o tesouro, el entrou no recinto do santuario cuns cantos compañeiros; despois de que entrou Antíoco, pecharon o santuario,

¹⁶e, abrindo unha trampa no teito, mataron a cantazos ó xeneral e ós seus acompañantes. Despois esnaquizáronos, cortáronlles a cabeza e botáronllela ós que estaban fóra.

¹⁷Sexa sempre bendito o noso Deus que acabou cos impíos!

¹⁸Como imos celebrar a purificación do templo no día vinte e cinco do mes de casleu, pareceunos cousa obrigada comunicárvolo para que tamén vós celebredes a festa das Tendas e mais do lume que se atopou cando Nehemías ofreceu sacrificios despois de reconstruír o templo e mais o altar.

¹⁹Pois cando os nosos maiores foron deportados a Persia, os piadosos sacerdotes de entón colleron lume do altar e ás agachadas escondérono nunha cova que parecía un pozo seco; e tan ben o esconderon que ninguén deu co sitio.

²⁰Moitos anos despois, cando Deus quixo, Nehemías, enviado polo rei de Persia, mandoulles buscar o lume ós fillos dos sacerdotes que o esconderan; pero, segundo dixeron eles, en vez de atopar lume o que atoparon foi un líquido moi mesto. Nehemías mandou que collesen dese líquido e que llo levasen.

²¹Cando as vítimas estaban xa preparadas derriba do altar, Nehemías mandoulles ós sacerdotes que botasen daquel líquido pola leña e polo que había sobre ela.

²²Así o fixeron. E de alí a pouco saíu o sol que antes estaba encuberto polas nubes, e acendeuse unha labarada que deixou abraiado a todo o mundo.

²³Mentres se ía consumindo o sacrificio, os sacerdotes e todos os presentes rezaban, Ionatán principiaba e os demais respondían con Nehemías.

²⁴Esta era a oración: —"Señor, Señor Deus, creador de todas as cousas, terrible e forte, xusto e agarimoso, único rei bondadoso,

²⁵único benfeitor e único xusto; todopoderoso e eterno, que salvas a Israel de todo mal, que escolliches e santificaches a nosos pais:

²⁶Acolle este sacrificio por todo o teu pobo Israel, garda e santifica a túa herdanza,

²⁷xunta ós nosos emigrantes, dálles a liberdade ós que están vivindo coma escravos dos pagáns, protexe ós desherdados e asoballados, para que recoñezan os pagáns que ti es o noso Deus.

²⁸Castiga ós opresores que nos aldraxan cheos de soberbia.

²⁹Transplanta ó teu pobo para o teu lugar santo, como dixo Moisés".

³⁰Os sacerdotes cantaban himnos.

³¹Cando xa se consumiu o sacrificio, Nehemías mandou botar o líquido que sobrara derriba doutras penas.

³²Así o fixeron, e acendeuse un lume; pero apagouse de seguida diante do resplandor da luz do altar.

³³Cando isto se soubo, e lle dixeron ó rei de Persia que no sitio en que os sacerdotes deportados esconderan o lume aparecera un líquido co que os compañeiros de Nehemías prenderan lume ó sacrificio,

³⁴o rei, despois de comprobar o feito, mandou acoutar o sitio e declarouno sitio sagrado.

³⁵Aquel día foi día de festa, e o rei recibiu e deu moitos regalos.

³⁶Os compañeiros de Nehemías chamáronlle a aquel líquido néftar, que quere dicir purificación, pero moitos chámanlle nafta.