Read Biblia SEPT Mateo 11 Bible Online

Mateo 11 - Biblia SEPT bible

Mateo 11

¹En rematando de lles dar estas instrucións ós doce discípulos, partiu de alí para ensinar e predicar por aquelas vilas.

²Xoán, oíndo falar na cadea das obras de Cristo, mandou os seus discípulos a lle preguntar:

³Es ti o que ten que vir ou esperamos a outro?

⁴Respondeulles Xesús: Ide e contádelle a Xoán o que estades oíndo e vendo:

⁵os cegos ven e os coxos andan, os leprosos fican limpos e os xordos oen, os mortos resucitan e ós pobres estáselles anunciando a Boa Nova.

⁶E ditoso quen non se escandalice de min!

⁷Non ben se foron eles, comezou Xesús a falar de Xoán á xente: Que fostes ver ó deserto?: unha cana abaneada polo vento?

⁸Pois logo, que fostes ver?: un home vestido con roupas finas? Pero os que visten roupas finas están nos pazos dos reis.

⁹Pois logo, a que saístes?: a ver un profeta? Si, e abofé que moito máis ca un profeta.

¹⁰Este é de quen está escrito: Olla, mando o meu mensaxeiro diante de ti, para que prepare o teu camiño.

¹¹Tede por seguro que non naceu de muller ninguén meirande ca Xoán Batista, aínda que o máis pequeno no Reino dos Ceos é meirande ca el.

¹²Desde o tempo de Xoán Batista ata agora o Reino dos Ceos está a ser violentado, e os violentos repáñano.

¹³Pois ata Xoán profetizaron todos os Profetas e mais a Lei.

¹⁴El é Elías, o que tiña que vir; así que aceptádeo, se queredes.

¹⁵Quen teña oídos, que escoite.

¹⁶Con quen compararía eu esta xeración? Aseméllase a eses rapaces que, sentados no rueiro, rifan entre si

¹⁷dicindo: Tocamos a frauta, e non bailastes; fixemos o pranto, e non chorastes.

¹⁸Porque apareceu Xoán, que nin comía nin bebía, e din: "ten o demo no corpo";

¹⁹Apareceu o Fillo do Home, que come e bebe, e din: "que larpeiro, que bebedor e que amigo de recadadores e pecadores". Con todo, a sabedoría quedou acreditada polas súas obras.

²⁰Entón empezou a rifarlles ás vilas nas que fixera a maior parte dos milagres, pero que non se converteran.

²¹Ai de ti, Corozaín! Ai de ti, Betsaida! Porque se en Tiro e Sidón se fixesen os milagres que se fixeron en vós, hai xa tempo que facían penitencia cubertas de saco e de cinsa.

²²Por iso dígovos: O día do Xuízo será moito máis livián para Tiro e Sidón do que para vós.

²³E ti, Cafarnaún: Seica pensas que vas chegar ata o ceo? Asolagaraste no abismo! Porque se en Sodoma se fixesen os milagres que se fixeron en ti, aínda duraba hoxe.

²⁴Por iso dígovos que Sodoma terá un día do Xuízo máis livián ca vós.

²⁵Naquel tempo dixo Xesús: Bendito sexas, meu Pai, Señor do ceo e mais da terra, porque lles escondiches estas cousas ós sabios e ós prudentes e llas revelaches á xente humilde.

²⁶Si, meu Pai, bendito sexas por che agradar iso así.

²⁷Meu Pai ensinoume todas as cousas e ninguén coñece ó Fillo agás o Pai, nin coñece ó Pai agás o Fillo e aquel a quen o Fillo llo queira revelar.

²⁸Achegádevos a min todos os que estades cansos e oprimidos, que eu vos aliviarei.

²⁹Cargade co meu xugo e aprendede de min, que son bo e humilde de corazón e atoparedes acougo para as vosas almas;

³⁰porque o meu xugo é livián e a miña carga lixeira.