Read Biblia SEPT Mateo 4 Bible Online

Mateo 4 - Biblia SEPT bible

Mateo 4

¹Foi entón cando o Espírito conduciu a Xesús ó deserto, para que Satán o tentase.

²Despois de xaxuar corenta días e corenta noites, acabou por ter fame.

³O tentador, achegándose a el, díxolle: Se es Fillo de Deus, manda que estas pedras se convertan en pan.

⁴Pero el respondeu: Está escrito: Non soamente de pan vive o home, senón de toda palabra saída da boca de Deus.

⁵Levouno logo o Satán á cidade santa, e púxoo na atalaia do templo,

⁶dicíndolle: Se es o Fillo de Deus, bótate de aquí embaixo, que está escrito: Mandará os seus anxos para que te coiden e te leven nas súas mans; e os teus pés non se mancarán nas pedras.

⁷Xesús respondeu: Tamén está escrito: Non tentarás o Señor, o teu Deus.

⁸Pero aínda o levou o Satán a un monte moi alto e, mostrándolle os reinos todos do mundo enteiro, cheos de esplendor,

⁹díxolle: Heiche dar todo isto se te prostras e me adoras.

¹⁰Entón replicoulle Xesús: Arreda, Satán, porque está escrito: Só ó Señor, o teu Deus, adorarás, e só a El darás culto.

¹¹Deixouno o Satán, e achegáronse os anxos para o serviren.

¹²Cando soubo Xesús que encadearan a Xoán, retirouse a Galilea.

¹³Deixando Nazaret, foise establecer en Cafarnaúm, na beira do mar, en terras de Zebulón e Naftalí,

¹⁴para que se cumprise o dito polo profeta Isaías:

¹⁵Terra de Zebulón, terra de Naftalí, camiño do mar na outra ribeira do Xordán. Galilea dos pagáns.

¹⁶O pobo que xacía na escuridade viu unha gran luz: Para os que habitaban no escuro país da morte brillou unha alborada.

¹⁷E desde aquela empezou Xesús a predicar, dicindo: Arrepentídevos, que o Reino dos Ceos xa está aí.

¹⁸Camiñando pola ribeira do mar de Galilea, viu a dous irmáns: Simón, tamén chamado Pedro, e Andrés; os dous, que eran pescadores, estaban largando o aparello no mar.

¹⁹Díxolles: Vide comigo, e fareivos pescadores de homes.

²⁰Eles deixaron de contado o aparello, e seguírono.

²¹Máis adiante atopou outros dous irmáns: Santiago e mais Xoán, fillos de Zebedeo, que estaban co seu pai na barca arranxando o aparello. Tamén os chamou, e

²²eles coa mesma deixaron a barca e mais a seu pai e seguírono.

²³Xesús percorría a Galilea enteira ensinando nas sinagogas e anunciando a Boa Nova do Reino, curando canta doenza padecía o pobo.

²⁴Falábase del en toda Siria e traíanlle enfermos con toda clase de doenzas e padecementos, endemoñados, epilépticos, tolleitos; e a todos curaba.

²⁵Eran moitos os que o seguían, un mundo de xente chegada de Galilea, Decápole, Xerusalén, Xudea e da outra banda do Xordán.