Read Biblia SEPT Marcos 16 Bible Online

Marcos 16 - Biblia SEPT bible

Marcos 16

¹Pasado o sábado, María Magdalena, María de Santiago e mais Salomé mercaron perfumes para iren embalsamalo.

²E moi cedo, no primeiro día da semana, despois da alborada, foron ó sepulcro.

³Ían comentando entre elas: Quen nos vai arredar a lousa da entrada do sepulcro?

⁴Pero, erguendo a vista, descubriron que a lousa estaba arredada; iso que era moi grande.

⁵Entrando no sepulcro, viron un mozo vestido de branco, sentado no lado dereito, e quedaron espantadas.

⁶Pero el díxolles: Non vos espantedes. Buscades a Xesús Nazareno, o crucificado? Non está aquí, resucitou. Mirade o lugar onde o puxeron.

⁷Agora ídelles dicir ós discípulos e mais a Pedro que el vai diante de vós a Galilea; alí o veredes, como vos ten dito.

⁸Elas saíron fuxindo do sepulcro, pasmadas e tremendo; e non lle contaron nada a ninguén, do medo que tiñan.

⁹Xesús resucitou no abrente do primeiro día da semana, e aparecéuselle en primeiro lugar a María Magdalena, da que botara sete demos.

¹⁰Ela fóillelo dicir ós compañeiros del, que estaban chorosos e tristeiros.

¹¹Pero estes, oíndolle dicir que estaba vivo e que ela o vira, non llo creron.

¹²Despois disto, aparecéuselles, en figura diferente, a dous que ían de camiño a un lugar.

¹³Estes fóronllelo contar tamén ós demais, pero nin a eles os creron.

¹⁴Por último, aparecéuselles ós Once mentres estaban á mesa, botándolles na cara a súa incredulidade e a dureza de corazón, por non creren a aqueles que o viran resucitado de entre os mortos.

¹⁵E díxolles: Ide polo mundo enteiro, anunciando a Boa Nova a toda a creación.

¹⁶Quen crea e se bautice, salvarase; quen non crea, condenarase.

¹⁷Os que crean irán acompañados destes sinais: no meu nome botarán demos, falarán linguas novas;

¹⁸collerán serpes coas mans, e se chegan a beber algún veleno, non lles fará mal ningún; imporanlles as mans ós enfermos, e estes curarán.

¹⁹O Señor, despois de lles falar así, elevouse ó ceo, e sentou á dereita de Deus.

²⁰Eles saíron a predicar por todas partes, contando coa colaboración do Señor, que confirmaba a súa palabra cos sinais que os acompañaban.