Read Biblia SEPT Marcos 2 Bible Online

Marcos 2 - Biblia SEPT bible

Marcos 2

¹De alí a uns días entrou de novo en Cafarnaún, e sóubose que estaba na casa;

²tantos se xuntaron que nin diante da porta había xa sitio. El expoñíalles a Palabra.

³Entón, entre catro, trouxeron un home tolleito.

⁴Pero, non podendo chegar ó pé del, pola moita xente que había, levantaron o teito onde el estaba, e abriron un furado ata poderen meter o leito co enfermo, e descolgalo.

⁵Xesús, vendo a fe que tiñan, díxolle ó tolleito: Meu fillo, quédanche perdoados os teus pecados.

⁶Pero alí sentados estaban algúns letrados, que matinaban para os seus adentros:

⁷"Pero, que está a dicir este home? Está blasfemando. Quen pode perdoar os pecados, senón unicamente Deus?"

⁸Xesús, decatándose axiña do que estaban cavilando, díxolles: Por que razoades así nos vosos adentros?

⁹Que é máis fácil: dicirlle a este tolleito: "quedan perdoados os teus pecados", ou dicirlle: "érguete, colle a padiola e vaite?"

¹⁰Pois para que vexades que o Fillo do Home ten poder para perdoar os pecados

¹¹dille ó tolleito, colle a padiola, e vaite á túa casa.

¹²E así foi: no instante, ergueuse, colleu o leito, e foise diante de todos; de tal modo que todos ficaron pasmados, e daban gloria a Deus dicindo: Nunca tal cousa vimos.

¹³Volveu saír para a beira do mar, e a xente toda seguía acudindo. E el ensinábaos.

¹⁴Ó pasar, viu a Leví, o de Alfeo, sentado no mostrador a cobrar a contribución, e dille: Sígueme. El ergueuse, e seguiuno.

¹⁵Aconteceu que estando Xesús á mesa de Leví, acompañado dos seus discípulos e mais outros recadadores de impostos e pecadores pois eran moitos os que o seguían,

¹⁶os letrados e fariseos, véndoo comer con eles, dixéronlles ós discípulos: Como é que come cos recadadores e pecadores?

¹⁷Xesús sentiunos, e contestoulles: Non son os sans, senón os enfermos, os que precisan médico. Eu non vin chamar polos xustos, senón polos pecadores.

¹⁸Un día no que os discípulos de Xoán e mais os fariseos gardaban o xaxún, viñéronlle preguntar: Como é que mentres os discípulos de Xoán e mais os dos fariseos gardan o xaxún, os teus non o gardan?

¹⁹Xesús contestoulles: Pero, logo, poden os convidados á voda xaxuar mentres dura a voda? Mentres teñan consigo o esposo non poden xaxuar.

²⁰Xa virá o día no que lles leven o esposo, e daquela si que xaxuarán.

²¹Ninguén lle bota un remendo de pano novo a un vestido vello, porque o novo tiraría polo vello e a rachadura faríase máis grande.

²²Tampouco ninguén bota viño novo en pelellos vellos, porque o viño rebentaría os pelellos, e perderíanse pelellos e viño. Xa sabedes: a viño novo, pelellos novos.

²³Un sábado cadrou que pasaron por uns terreos sementados; os seus discípulos, mentres ían de camiño, empezaron a arrincar espigas.

²⁴Entón dixéronlle os fariseos: Mira para aí, por que fan o que non lles está permitido facer nun sábado?

²⁵El respondeulles: Seica non sabedes o que fixo David, cando el e mais os seus acompañantes se viron apurados e con fame?

²⁶No tempo do Sumo Sacerdote Abiatar entrou na casa de Deus e comeu o pan ofrecido pan que só podían comer os sacerdotes e repartiu incluso cos seus compañeiros.

²⁷E concluíu: O sábado fíxose para o servizo do home, e non o home para o servizo do sábado.

²⁸Así que o Fillo do Home é Señor incluso do sábado.