Read Biblia SEPT Deuteronomio 14 Bible Online

Deuteronomio 14 - Biblia SEPT bible

Deuteronomio 14

¹Fillos sodes vós do Señor, o voso Deus. Non vos fagades incisión, non fagades rapado entre os vosos ollos por quen morre,

²xa que ti es un pobo consagrado ao Señor, o teu Deus, e o Señor escolleute para que lle foses o pobo da súa especial posesión entre todos os pobos que hai sobre a terra.

³Non comerás nada abominable:

⁴Estes son os animais que poderedes comer: o boi, o año, o cabrito,

⁵o cervo, a gacela, a cabra corza, a cabra montesa, o antílope, o bisonte e castrón montés.

⁶Todo animal que ten o casco partido e fendido en dúas metades, e que remoe, podedes comelo.

⁷De entre eles soamente non podedes comer estes: o camelo, a lebre e o coello, pois aínda que remoen non teñen o casco partido. Para vós serán impuros.

⁸E o porco, aínda que ten o casco partido, pero non remoe, será impuro para vós. Non lle poderedes comer a carne, nin poderedes tocar o seu cadáver.

⁹De todo o que hai na auga poderedes comer isto: todo o que ten aletas e escamas podedes comelo;

¹⁰pero todo o que non teña aletas nin escamas non o podedes comer, será impuro para vós.

¹¹Todo paxaro puro poderedes comelo.

¹²Velaí os que non poderedes comer: a aguia, o voitre barbado, a aguia de mar;

¹³o voitre emigrante, e o voitre de calquera caste,

¹⁴e corvo de calquera caste,

¹⁵e a avestruz, o falcón, a gaivota, e toda especie de azor;

¹⁶o moucho, o ibis, o cisne,

¹⁷o pelicano, a grúa, o corvo do mar,

¹⁸A cegoña, a garza real nas súas diferentes especies, a bubela e o morcego.

¹⁹Todo insecto voador será impuro para vós, non se comerá.

²⁰Podedes comer todos os paxaros puros.

²¹Non podedes comer ningún animal que morreu: darasllo ao emigrante que está dentro das portas da túa cidade e comerao, ou se non, véndello ao estranxeiro, xa que ti es un pobo consagrado ao Señor, o teu Deus. Non cocerás o cabrito no leite da súa nai.

²²Xuntarás o décimo de todos os produtos da túa sementeira, do que dá o campo, ano tras ano,

²³e comeralos na presenza do Señor, o teu Deus, no santuario que escolla para facer residir alí o seu Nome: o décimo do teu trigo, do teu mosto e do teu aceite e mais os primoxénitos do teu gando e do teu rabaño, para que aprendas a respectar o Señor, o teu Deus, todos os días.

²⁴Pero se o camiño desde onde vives fose tan grande que non es capaz de levar o décimo (porque está moi lonxe de ti o santuario que o Señor, o teu Deus, escolla para pór alí o seu Nome, e porque o Señor, o teu Deus, te bendiciu con abundancia)

²⁵pon o décimo en diñeiro, colle o diñeiro na túa man, e vai ao santuario que escolla o Señor, o teu Deus.

²⁶Logo compra con diñeiro todo o que lle apetece á túa gorxa: gando, reses, viño e bebidas fermentadas e todo o que che apeteza. Come alí na presenza do Señor, o teu Deus, e fai festa, ti e mais os da túa casa.

²⁷Non te esquezas do levita que vive dentro das portas da túa cidade, pois non ten parte nin herdanza contigo.

²⁸O cabo de tres anos, sacarás todo o décimo dos teus produtos dese ano e poralos ás portas da túa cidade.

²⁹Virá o levita, pois non ten parte nin herdanza contigo, e mais o emigrante, o orfo e a viúva que hai dentro das portas da túa cidade, e comerán ata se fartaren para que te bendiga o Señor, o teu Deus, en todas as obras das túas mans que queiras facer.