Read Biblia SEPT Deuteronomio 17 Bible Online

Deuteronomio 17 - Biblia SEPT bible

Deuteronomio 17

¹Non lle ofrecerás en sacrificio ao Señor, o teu Deus, touro ou año que teña algún defecto ou cousa mala, pois isto sería unha abominación para o Señor, o teu Deus.

²Se se atopa no medio de ti nalgunha das cidades que o Señor, o teu Deus, che vai dar, home ou muller que faga o que está mal ós ollos do Señor, o teu Deus, transgredindo a súa Alianza,

³e que vai dar culto a deuses alleos e prostrarse diante deles, diante do sol, ou da lúa ou de todo o exército do ceo, cousa que eu non che mando;

⁴se cho denuncian ou se te decatas, investiga con todo o coidado: se se establece a verdade do tal feito, comprobándose que esa abominación se cometeu en Israel,

⁵entón sacarás fóra das portas das túas cidades o home ou muller que tal mal feito cometeron; ao tal home ou á tal muller apedraralos ata que morran.

⁶O que ha morrer será morto pola declaración de dúas ou de tres testemuñas: non será morto pola declaración dunha soa testemuña.

⁷A pedrada das testemuñas será a primeira en darlle morte, e a man de todo o pobo seguirá despois, e deste xeito retirarás do medio de ti este mal.

⁸Se che resultan demasiado difíciles algúns asuntos relativos ao xuízo de sangue vertido, de litixios e de feridas —asuntos de disputa legal nas portas das túas cidades—, entón levántate e sube ao santuario que o Señor, o teu Deus, escolla,

⁹e vai xunto ós sacerdotes levitas e xunto ao xuíz que haxa neses días; consúltaos, e que fagan saber a sentencia do xuízo.

¹⁰Logo actúa conforme ao fallo que se che comunique desde o santuario que o Señor escolla, e está atento a executalo todo tal como cho ordenen.

¹¹Has de actuar conforme ao texto da resolución que che ordenen e conforme á sentencia que che diten. Non te apartarás nin á dereita nin á esquerda da decisión xudicial que che fagan coñecer.

¹²O home que actúe con orgullo sen lle querer facer caso ao sacerdote, que está servindo alí ao Señor, o teu Deus, ou ao xuíz, ese tal home ha de morrer. Deste xeito apartarás a maldade de Israel,

¹³pois todo o pobo escoitará isto e collerá medo; e así non se volverá a deixar levar polo orgullo.

¹⁴Cando entres no país que o Señor, o teu Deus, che vai dar, e o collas en posesión e vivas nel, entón has de dicir: Quero pór sobre min un rei coma todos os pobos que me rodean.

¹⁵Has de pór sobre ti soamente o rei que escolla o Señor, o teu Deus; de entre os teus irmáns has de pór sobre ti un rei, non poderás pór sobre ti un estranxeiro, que non sexa irmán teu.

¹⁶Soamente que non poderá aumentar o número dos seus cabalos e non fará volver o seu exército a Exipto, para aumentar o número de cabalos, pois o Señor tenvos dito: Non volvades de novo por este camiño.

¹⁷Nin tampouco el deberá aumentar o número das súas mulleres, para que non se lle extravíe o seu corazón; a prata e o ouro non os deberá aumentar moito.

¹⁸Cando se entronice no trono do seu reino, mandará que lle escriban nun libro unha copia desta Lei, conforme ao orixinal que está no poder dos sacerdotes levitas.

¹⁹Esa copia teraa con el e leraa todos os días da súa vida, para que aprenda a respectar o Señor, seu Deus, gardando todas as disposicións desta Lei e estes preceptos, póndoos en práctica.

²⁰De xeito que o seu corazón non se ensoberbeza sobre os seus irmáns nin se aparte dos mandamentos nin á dereita nin á esquerda, a fin de alongar no medio de Israel os días do seu reinado: do seu e mais dos seus fillos.