Read Biblia SEPT Deuteronomio 18 Bible Online

Deuteronomio 18 - Biblia SEPT bible

Deuteronomio 18

¹Os sacerdotes levitas, toda a tribo de Leví, non terán parte nin herdanza con Israel; comerán as ofrendas feitas en honor do Señor, isto é, a parte que é do Señor.

²A tribo de Leví non terá herdanza no medio dos seus irmáns: o Señor será a súa herdanza, tal como llo prometeu.

³Estes serán os dereitos dos sacerdotes sobre aqueles do pobo que inmolan en sacrificio un touro ou un año: daráselle ao sacerdote a pa, as queixadas e o estómago.

⁴Has de lle da as primicias do teu trigo, do teu mosto e do teu aceite, e mais as primicias da rapa do teu rabaño,

⁵pois escolleuno o Señor, o teu Deus, entre todas as túas tribos, para estar servindo todos os días o Nome do Señor, el e mais os seus fillos.

⁶Se vén un levita dunha das túas cidades, de calquera parte de Israel, onde el habita, e se chega con todo o apetito da súa gorxa ao santuario que o Señor escolla,

⁷pode entrar en servizo ao Nome do Señor, seu Deus, o mesmo ca calquera dos seus irmáns, os levitas que están alí na presenza do Señor.

⁸Comerán a partes iguais, a non ser que sexa un dos levitas que xa vendeu a súa parte ós que a precisan.

⁹Cando entres no país que o Señor, o teu Deus, che vai dar, non aprenderás a comportarte conforme as abominacións deses pobos.

¹⁰Non se atopará en ti quen faga pasar o seu fillo e á súa filla polo lume, quen prediga adiviñacións, quen faga encantamentos, quen lea as sortes nos astros, quen se dea á bruxería,

¹¹encantadores de feitizos, quen faga preguntas ao espírito dos mortos e ao que ten o espírito adiviño dos mortos, quen consulte ós mortos.

¹²Xa que todo aquel que practique estas cousas é unha abominación para o Señor, e por mor destas abominacións o Señor, o teu Deus, vai privar a esas nacións da súa herdanza, soamente coa túa presenza.

¹³Apégate completamente ao Señor, o teu Deus.

¹⁴Aínda que estes pobos, dos que vas tomar posesión, fagan caso dos encantadores e dos adiviños, a ti o Señor, o teu Deus, non che permite obrar deste xeito.

¹⁵A un profeta coma min farao xurdir o Señor, o teu Deus, no medio de ti, de entre os teus irmáns. Facédelle caso,

¹⁶tal como llo pediches ao Señor, o teu Deus, no Horeb o día de asemblea, dicindo: Non quero seguir escoitando a voz do Señor, meu Deus, nin ver máis esta grande labarada, para non morrer.

¹⁷E entón o Señor díxome: Fixeron ben en dicir isto.

¹⁸Fareilles xurdir un profeta coma ti do medio de seus irmáns e porei as miñas palabras na súa boca e falaralles todo o que eu lle mande,

¹⁹e a aquel que non lles faga caso ás miñas palabras, as que o profeta anuncie no meu Nome, eu pedireille contas.

²⁰Pero o tal profeta, se ten o atrevemento de dicir no meu Nome cousas que eu non lle mandei dicir e fala no nome de deuses alleos, entón morrerá ese profeta.

²¹Certo que podes pensar no teu interior: Como podemos distinguir a palabra que nos dixo o Señor, se o profeta a di no Nome do Señor?

²²Cando esta palabra non aconteza nin se cumpra esa palabra, é que non a dixo o Señor: o profeta falou por soberbia; non lle teñas medo.