Read Biblia SEPT Deuteronomio 23 Bible Online

Deuteronomio 23 - Biblia SEPT bible

Deuteronomio 23

¹Un home non pode casar cunha muller do pai, nin poderá retirar a punta do manto de seu pai.

²O castrado por esmagamento e o que ten o pene cortado non entrarán na asemblea do Señor.

³O bastardo non entrará na asemblea do Señor; aínda que sexa a súa décima xeración, non entrará na asemblea do Señor.

⁴O amonita e mais o moabita non entrarán na asemblea do Señor; aínda que sexa a décima xeración, non entrará na asemblea do Señor endexamais,

⁵polo feito de que non vos saíron ao encontro con pan e auga ao voso camiño, cando saístes de Exipto, e polo feito de que alugaron contra vós a Balaam, fillo de Beor, natural de Petor en Mesopotamia, para maldicirte.

⁶Pero o Señor, o teu Deus, non quixo facerlle caso a Balaam, e o Señor, o teu Deus, cambiou no teu favor a maldición en bendición, pois queríate o Señor, o teu Deus.

⁷Non procures a súa fartura nin a súa prosperidade durante todos os teus días, xamais.

⁸Non consideres abominable o edomita, pois é teu irmán. Non consideres abominable o exipcio, pois ti fuches emigrante no seu país.

⁹Os fillos que lles nazan, na terceira xeración, entrarán na asemblea do Señor.

¹⁰Cando saias de acampada na loita contra os teus inimigos, gárdate ben de calquera cousa mala.

¹¹Se algún home dos teus non está puro por mor dalgún incidente nocturno, que saia do campamento: non poderá entrar no campamento.

¹²A caída da tarde lavarase con auga e ao porse o sol, poderá entrar no campamento.

¹³Mexarás fóra do campamento, e fóra sairás tamén a defecar.

¹⁴Co teu equipamento terás unha estaca, e cando vaias anicarte para defecar, cavarás con ela, anicaraste e logo taparás o teu excremento,

¹⁵pois o Señor, o teu Deus, anda camiñando polo medio do teu campamento, para salvarte e para entregarche á túa disposición os teus inimigos. Por isto o teu campamento estará consagrado, de xeito que o Señor non vexa en ti cousa de que avergoñarse, e non deixe de seguir estando detrás de ti.

¹⁶Non entregues ao seu amo o servo que escapou de par del para onda ti;

¹⁷contigo vivirá no medio de ti, no lugar que escolla nunha das túas cidades, onde estea feliz. Non o oprimirás.

¹⁸Non haberá prostituta sagrada entre as fillas de Israel nin prostituto sagrado entre os fillos de Israel.

¹⁹Non entrará na casa do Señor, o teu Deus, salario de prostituta sacra, nin paga de prostituto sacro, para cumprir calquera promesa, pois tanto o un coma a outra son abominación para o Señor, o teu Deus.

²⁰Non lle prestes con interese a teu irmán: nin empréstito de cartos, nin de comida, nin de calquera cousa que se poida emprestar.

²¹O estranxeiro prestaraslle con intereses; a teu irmán non lle podes emprestar con intereses, para que o Señor, o teu Deus, te bendiga en todas as túas empresas, no país onde vas entrar a tomar posesión del.

²²Cando fagas un voto ao Señor, o teu Deus, non demores en cumprilo, porque o Señor, o teu Deus, reclamaracho a ti e será un pecado para ti.

²³Pero se deixas de facer votos, non será pecado para ti.

²⁴Vixía o que sae dos teus labios, para o poñeres en práctica tal como llo prometiches ao Señor, o teu Deus, en ofrenda espontánea, que pronunciaches coa túa boca.

²⁵Cando entres na viña do teu próximo, come uvas. Si, farta a túa gorxa! Pero non poñas nada na túa cesta.

²⁶Cando entres nos eidos do teu próximo, podes arrincar espigas coa túa man, pero a fouce non a movas no pan do teu próximo.