Read Biblia SEPT Deuteronomio 27 Bible Online

Deuteronomio 27 - Biblia SEPT bible

Deuteronomio 27

¹Moisés e mais os anciáns de Israel ordenáronlle ao pobo nestes termos: —"Gardade todos os mandamentos que eu vos mando hoxe.

²O día que crucedes o Xordán camiño do país que o Señor, o teu Deus, che vai dar, erguerás pedras grandes e encalaralas con cal,

³e logo escribirás sobre elas todas as formulacións desta lei, ao cruzares para entrares no país que o Señor, o teu Deus, che vai dar, país que deita leite e mel, tal como cho dixo o Señor, Deus de teus pais.

⁴Cando crucedes o Xordán, ergueredes no monte Ebal esas pedras que eu vos diga e encalarédelas con cal.

⁵Construirás alí un altar en honra do Señor, o teu Deus, un altar de pedras que non labrarás co cicel.

⁶Pedras enteiras construirán o altar do Señor, o teu Deus, sobre o que lle ofrendarás holocaustos ao Señor, o teu Deus.

⁷Sacrificarás sobre el o sacrificio de comuñón e ti comerás alí e alegraraste na presenza do Señor, o teu Deus.

⁸Sobre as pedras escribirás todas as formulacións desta lei, escribiralas clara e esteticamente".

⁹Moisés e mais os sacerdotes levitas faláronlle a todo Israel nestes termos: —"Garda silencio e escoita, Israel: No día de hoxe quedaches convertido nun pobo para o Señor, o teu Deus.

¹⁰Por isto has de escoitar a voz do Señor, o teu Deus, e has de pór en práctica os seus mandamentos e mais os seus preceptos, que eu che mando hoxe".

¹¹Ese día Moisés mandoulle ao pobo isto:

¹²—"Estes son os que han de estar de pé no monte Garizim, para bendicir o pobo, cando crucedes o Xordán: Simeón, Leví, Xudá, Isacar, Xosé e Benxamín.

¹³Estes son os que han de estar de pé no monte Ebal, por mor da maldición: Rubén, Gad, Axer, Zebulón, Dan e Naftalí.

¹⁴Os levitas collerán a palabra e diranlles a todos os homes de Israel en voz alta:

¹⁵Maldito sexa o home que faga un ídolo e unha imaxe de fundición —abominación para o Señor, obra das mans dun artista— e o poña en lugar escondido. E todo o pobo collerá a palabra e dirá: Amén.

¹⁶Maldito sexa quen desprece a seu pai e a súa nai. E todo o pobo dirá: Amén.

¹⁷Maldito sexa quen lle dea para atrás ao marco do seu veciño. E todo o pobo dirá: Amén.

¹⁸Maldito sexa quen faga desviarse a un cego do seu camiño. E todo o pobo dirá: Amén.

¹⁹Maldito sexa quen torza o dereito de emigrante, do orfo e da viúva. E todo o pobo dirá: Amén.

²⁰Maldito sexa quen se deite coa muller de seu pai, pois destapou un lenzo do mantón de seu pai. E todo o pobo dirá: Amén.

²¹Maldito sexa quen se deite cun animal calquera. E todo o pobo dirá: Amén.

²²Maldito sexa quen se deite coa súa media irmá, filla do pai ou da nai. E todo o pobo dirá: Amén.

²³Maldito sexa quen se deite coa súa sogra. E todo o pobo dirá: Amén.

²⁴Maldito sexa quen mate o seu veciño en secreto. E todo o pobo dirá: Amén.

²⁵Maldito sexa quen colla un regalo para matar a aspiración dunha vida inocente. E todo o pobo dirá: Amén.

²⁶Maldito sexa quen non manteña as formulacións desta lei para pólas por obra. E todo o pobo dirá: Amén.