Read Biblia SEPT Xoán 2 Bible Online

Xoán 2 - Biblia SEPT bible

Xoán 2

¹O terceiro día houbo un casamento en Caná de Galilea, e estaba alí a nai de Xesús.

²Tamén foi convidado Xesús e mais os seus discípulos ó casamento.

³Chegou a faltar o viño e a nai de Xesús díxolle: Non che teñen viño.

⁴Replicoulle Xesús: Muller que ten que ver iso comigo e contigo? Aínda non chegou a miña hora.

⁵Súa nai díxolles entón ós servidores: Facede o que el vos diga.

⁶Había alí seis tallas de pedra para as purificacións dos xudeus, que levaban ó pé de cen litros cada unha.

⁷E ordenoulles Xesús: Enchede de auga as tallas. Eles enchéronas de todo.

⁸Díxolles entón: Collede agora e levádelle a proba ó mestresala. Eles levárona.

⁹E, cando o mestresala probou a auga volta viño, sen saber de onda viña (os servidores si que o sabían, que eles colleran a auga) falou co noivo

¹⁰e díxolle: Todo o mundo pon de primeiras o viño bo e, cando xa están bébedos, o máis cativo; ti, en troques, deixáche-lo viño bo para agora.

¹¹Foi así como fixo Xesús o primeiro dos signos en Caná de Galilea; manifestou a súa gloria, e creron nel os seus discípulos.

¹²Despois disto baixou a Cafarnaúm, con súa nai, seus irmáns e mais os seus discípulos, e quedou alí uns poucos días.

¹³Estaba a chegar a Pascua dos xudeus e subiu Xesús a Xerusalén.

¹⁴Atopou no templo os que vendían bois, ovellas e pombas e mais os cambiadores, sentados;

¹⁵foi el e fixo un vergallo con cordas de xunco, botounos a todos fóra do templo e as ovellas e os bois tamén; guindou cos cartos e virou as mesas dos cambiadores

¹⁶e ós que vendían as pombas, díxolles: Arredádeme de aquí estas cousas, non fagades da casa do meu Pai unha casa de negocio.

¹⁷Lembráronse os seus discípulos de que estaba escrito: "O celo da túa casa devórame".

¹⁸Pola súa parte, os xudeus preguntáronlle: Que sinal nos mostras, para faceres estes feitos?

¹⁹Respondeulles Xesús: Derrubade este templo e erguereino en tres días.

²⁰Replicáronlle os xudeus: Corenta e seis anos levou edificar este templo e halo erguer ti en tres días?

²¹Pero el dicíao referíndose ó templo do seu corpo.

²²Cando se ergueu de entre os mortos, lembraron os seus discípulos o que dixera e creron na Escritura e no dito de Xesús.

²³Estando Xesús en Xerusalén pola festa da Pascua, moitos creron nel, vendo os signos que facía.

²⁴Pero, pola súa parte, Xesús non se fiaba deles, porque os coñecía a todos.

²⁵Non precisaba de que ninguén lle dese informacións de ninguén, que ben coñecía el o que había no home.