Read Biblia SEPT Feitos 8 Bible Online

Feitos 8 - Biblia SEPT bible

Feitos 8

¹Saulo aprobaba a súa morte. Aquel día levantouse unha grande persecución contra a Igrexa de Xerusalén, e todos, agás os apóstolos, dispersáronse polas terras da Xudea e da Samaría.

²Uns homes piadosos enterraron a Estevo e fixeron por el un gran pranto.

³En canto a Saulo, maltrataba a Igrexa: entraba polas casas, arrastraba homes e mulleres e mandábaos á cadea.

⁴Os que se dispersaron ían por todas partes, anunciando a Boa Nova da Palabra.

⁵Filipe baixou á cidade de Samaría e predicoulles o Mesías.

⁶O pobo, dun acordo, atendía ó que dicía Filipe, sentindo e vendo os sinais que facía;

⁷pois de moitos posuídos saían espíritos impuros a berros, e moitos paralíticos e coxos quedaban curados.

⁸A cidade encheuse de alegría.

⁹Había un home naquela cidade, chamado Simón, que exercía de meigo e pasmaba á xente de Samaría, dicíndolles ser alguén importante.

¹⁰Todos, desde o máis pequeno ó máis grande, facíanlle caso, porque dicían: "Este é a forza de Deus, chamada a Grande".

¹¹E facíanlle caso, porque había tempo que os tiña pasmados con meiguerías.

¹²Pero cando creron a Filipe, que anunciaba o Reino de Deus e o nome de Xesús Cristo, fixéronse bautizar homes e mulleres.

¹³O mesmo Simón tamén creu e, despois de bautizado, andaba sempre con Filipe e ficaba abraiado ó ver os sinais e milagres que se facían.

¹⁴O sentiren dicir os apóstolos, que estaban en Xerusalén, que Samaría acollera a palabra de Deus, mandáronlles a Pedro e a Xoán.

¹⁵Baixaron logo alí, e oraron polos samaritanos, para que recibisen o Espírito Santo,

¹⁶pois aínda non baixara sobre ningún deles: só os bautizaran no nome do Señor Xesús.

¹⁷Entón, fóronlles impoñendo as mans e recibiron o Espírito Santo.

¹⁸Vendo Simón que pola imposición das mans dos apóstolos se daba o Espírito, ofreceulles cartos,

¹⁹dicindo: Dádeme a min tamén ese poder para que aquel a quen lle impoña as mans, reciba o Espírito Santo.

²⁰Mais Pedro respondeulle: Así rebentes ti e mais o teu diñeiro! Ti coidas que o don de Deus se pode adquirir con cartos?

²¹Non tes parte nin sorte neste asunto, porque o teu corazón non é recto diante de Deus.

²²Arrepíntete desa malicia túa, e pídelle ó Señor, a ver se che perdoa o sentir do teu corazón,

²³pois vexo que estás destinado á amargura do fel e ás cadeas dos malvados.

²⁴Simón respondeu: Rezade vós por min ó Señor, para que non me acaia nada do que acabades de dicir.

²⁵Eles entón, despois de testificaren e anunciaren a palabra do Señor, volveron para Xerusalén, evanxelizando en moitas aldeas de Samaría.

²⁶Un anxo do Señor faloulle a Filipe deste xeito: Anda, diríxete cara ó sur polo camiño que baixa de Xerusalén a Gaza, a través do deserto.

²⁷Púxose en camiño e dirixiuse cara alá. Un etíope, eunuco, funcionario de Candaces, raíña da Etiopía, que estaba encargado de todos os seus tesouros, fora a Xerusalén como peregrino.

²⁸De volta, sentado no seu carro, ía lendo no profeta Isaías.

²⁹Díxolle o Espírito a Filipe: Achégate e ponte a par dese carro.

³⁰Correndo Filipe, sentiu que ía lendo no profeta Isaías e preguntoulle: Entendes o que les?

³¹Contestoulle: Como o vou entender, se ninguén mo explica? E convidou a Filipe a que subise a sentar con el.

³²A pasaxe da Escritura que lía era esta: Coma ovella levárono ó matadoiro; e coma año mudo diante de quen o rapa, así El non abría a súa boca.

³³Humillárono, negándolle a xustiza, quen contará a súa descendencia? A súa vida foi arrincada da terra.

³⁴Dirixíndose a Filipe, díxolle o eunuco: Por favor de quen di isto o profeta? De si mesmo ou doutro?

³⁵Filipe entón tomou a palabra e partindo desa pasaxe da Escritura, anuncioulle a Boa Nova de Xesús.

³⁶De camiño, chegaron a un sitio con auga e dixo o eunuco: Aquí hai auga, por que non me podo bautizar eu?

³⁸E mandou parar o carro. Baixaron os dous á auga, Filipe e mais o eunuco, e Filipe bautizouno.

³⁹Cando subiron da auga, o Espírito do Señor arrebatou a Filipe. O eunuco xa non o viu máis, pero seguiu o seu camiño cheo de alegría.

⁴⁰Filipe atopouse en Azoto e evanxelizaba todas as vilas por onde pasaba, ata chegar a Cesarea.