Read Biblia SEPT Romanos 15 Bible Online

Romanos 15 - Biblia SEPT bible

Romanos 15

¹Nós, os que estamos seguros, temos que aturar as feblezas dos inseguros, e non compracernos a nós mesmos.

²Cada un de nós compraza ó seu próximo para o ben, con miras á edificación.

³Pois tampouco Cristo non se compraceu a si mesmo; ó contrario, como está escrito: as aldraxes dos que te aldraxaban a ti caeron enriba de min.

⁴Ora, todo canto antigamente se escribiu, escribiuse para a nosa instrución: para que entre a nosa paciencia e o consolo que dan as Escrituras, manteñamos a esperanza.

⁵Que o Deus da paciencia e do consolo vos faga ter un mesmo sentir entre vós, conforme o exemplo de Cristo Xesús.

⁶Para que cun só corazón e unha soa boca loedes a Deus, Pai do noso Señor Xesús Cristo.

⁷Por iso, acollédevos uns a outros, como tamén Cristo vos acolleu, para gloria de Deus.

⁸Pois dígovos que Cristo se fixo servidor dos xudeus en razón da fidelidade de Deus, para lles mostrar a firmeza das promesas feitas ós patriarcas;

⁹e tamén para que os xentís, pola súa parte, glorifiquen a Deus en razón da súa misericordia. Tal como está escrito: Por iso loareite por medio das nacións e cantarei himnos ó teu nome.

¹⁰E de novo di: Alegrádevos, nacións, xuntamente co seu pobo.

¹¹E noutro lugar: Loade o Señor todas as nacións, e celébreno todos os pobos.

¹²E tamén di Isaías: Abrollará a raíz de Iexé, e xurdirá o que vai dominar as nacións, e nel poñerán a esperanza os xentís.

¹³Que o Deus da esperanza vos encha de alegría e de paz na vosa fe, para que rebordedes na esperanza pola forza do Espírito Santo.

¹⁴Eu sei moi ben, meus irmáns, que tamén vós estades cheos de bondade, ateigados de toda sabedoría, e capacitados para vos aconsellar uns a outros.

¹⁵Con todo, escribinvos cun chisco de atrevemento para avivar as vosas lembranzas. Fíxeno en virtude da graza que me deu Deus,

¹⁶para ser eu ministro de Cristo Xesús en favor dos xentís, exercendo de sacerdote en servizo do Evanxeo de Deus, a fin de que a ofrenda dos xentís sexa agradable, xa que a santificou o Espírito Santo.

¹⁷Por tanto, no tocante ó servizo de Deus, os meus motivos de orgullo están en Cristo Xesús.

¹⁸Pois non me atrevería a falar de nada, fóra do que Cristo, para conseguir a obediencia dos xentís, fixo por min de palabra e de obra,

¹⁹A forza de milagres e prodixios e polo poder do Espírito. De maneira que desde Xerusalén e arredores ata o Ilírico, completei a predicación do Evanxeo de Cristo.

²⁰De tal xeito que tiven a honra de evanxelizar onde nunca se falou de Cristo, para non edificar enriba de alicerces alleos;

²¹senón como está escrito; Verano aqueles ós que aínda non se lles falara del, e comprenderán aqueles que nunca oíran.

²²Foi isto mesmo o que decote me impedira ir onda vós.

²³Mais agora, ó non me quedar xa lugar nestas rexións e, como hai moitos anos que estou con ganas de ir ata onda vós,

²⁴cando vaia a Hispania espérovos ver de paso e que vós me facilitedes a viaxe; aínda que primeiro quero gozar un pouco convosco.

²⁵Arestora vou ir a Xerusalén para facer un servizo ós irmáns,

²⁶pois Macedonia e Acaia quixeron facer unha colecta a prol dos pobres que hai entre os crentes de Xerusalén.

²⁷Así o quixeron, e con razón, posto que están en débeda con eles. Porque, se os xentís tiveron parte nos seus bens espirituais, deben tamén á súa vez partillar con eles os materiais.

²⁸Rematado este asunto e entregada oficialmente esa colecta, viaxarei para Hispania, pasando por aí.

²⁹Sei que indo por onda vós irei coa plena bendición de Cristo.

³⁰E agora pídovos, irmáns, polo noso Señor Xesús Cristo e polo amor que inspira o Espírito, que loitedes comigo, dirixindo as vosas oracións a Deus por min;

³¹para que me vexa ceibo dos incrédulos de Xudea e que os irmáns acollan ben este meu servizo en Xerusalén.

³²Desa maneira poderei ir ledo onda vós e, se Deus quere, repousarei convosco.

³³Que o Deus da paz vos acompañe a todos. Amén.