Read Biblia SEPT Romanos 16 Bible Online

Romanos 16 - Biblia SEPT bible

Romanos 16

¹Recoméndovos a Febe, nosa irmá, que é diaconisa da Igrexa de Céncreas.

²Acollédea coma cristiáns dun xeito digno dos crentes e axudádea en todo canto lle cumpra, pois tamén ela axudou a moitos, empezando por min.

³Dádelles saúdos a Prisca e Aquila, os meus colaboradores na obra de Cristo Xesús.

⁴Todos eles estaban dispostos a pó—lo pescozo pola miña vida e a todos lles estou moi agradecido, non só eu, senón todas as igrexas dos xentís.

⁵Saúdos á igrexa que se xunta na casa del. Saúdos a Epéneto, o meu amigo, que é a primicia da Igrexa de Asia para Cristo.

⁶Saúdos para María, que tanto se molestou por vós.

⁷Saúdos para Andrónico e Xunias, os meus parentes e compañeiros de cárcere. Eles son insignes entre os apóstolos, e creron en Cristo antes ca min.

⁸Saúdos para Ampliato, o meu querido no Señor.

⁹Saúdos para Urbano, colaborador meu na obra de Cristo e para o meu querido Eustaquio.

¹⁰Saúdos para Apeles, xenuíno discípulo en Cristo. Saúdos para todos os da casa de Aristóbulo.

¹¹Dádelle saúdos ó meu parente Herodión. Saúdos para os de Narciso, que se conservan fieis ó Señor.

¹²Saúdos a Trifene e Trifosa, que traballan polo Señor. Saúdos á querida Pérside, que tanto traballou polo Señor.

¹³Saúdos a Rufo, escolleito do Señor, e á súa nai, que tamén é miña.

¹⁴Saúdos para Asíncrito, para Flegonte, para Hermes, para Patrobas, para Hermas e ós irmáns que viven con eles.

¹⁵Saúdos tamén a Filólogo, a Xulia, Nereo e á súa irmá, e a Olimpio e a todos os santos que están con eles.

¹⁶Saudádevos uns a outros co ósculo litúrxico. Mándanvos saúdos todas as igrexas de Cristo.

¹⁷Rógovos, irmáns, que vos gardedes dos que son causa de divisións e de escándalo en contra da doutrina que aprendestes, e arredade deles.

¹⁸Todos eses non serven a Cristo noso Señor, senón ó seu propio ventre, e con palabras amorosas e adozadas extravían os corazóns dos inocentes.

¹⁹A sona da vosa fe chegou a todas partes. Alégrome ben por vós. Pero quero que sexades listos para o ben e inocentes para o mal.

²⁰O Deus da paz esmagará a Satán ben axiña debaixo dos vosos pés. A graza do noso Señor Xesús vos acompañe.

²¹Mándanvos saúdos Timoteo, o meu axudante, e Lucio e Iasón e Sosípatro, os meus parentes.

²²Saúdovos no Señor, eu, Tercio, que pasei a limpo esta carta.

²³Mándavos saúdos Gaio, pousadeiro meu e de toda a igrexa.

²⁴Saúdavos Erasto, o tesoureiro da cidade e mais o noso irmán Cuarto.

²⁵A aquel que é potente para vos afianzar no meu Evanxeo e no anuncio de Xesús Cristo, conforme a revelación do misterio escondido durante tempos eternos,

²⁶pero manifestado agora polas Escrituras proféticas, e por disposición do Deus eterno dado a coñecer a todas as nacións para as levar á obediencia da fe,

²⁷A Deus, o único sabio, por medio de Xesús Cristo, sexa a gloria para sempre. Amén.