Read Biblia SEPT 1 Corintios 5 Bible Online

1 Corintios 5 - Biblia SEPT bible

1 Corintios 5

¹Non se oe falar doutra cousa que da indecencia que hai entre vós; e dunha indecencia tal, que nin entre os pagáns se viu cousa coma ela. Pois chega a darse o caso de que un vive coa muller de seu pai.

²E vós tan fachendosos, en lugar de poñervos de loito, para que desapareza do medio de vós quen tal cousa fai!

³Pois eu, fisicamente ausente pero presente en espírito, xa tomei unha decisión sobre o que tal fixo, coma se estivese aí:

⁴que xuntándonos no nome do noso Señor Xesús vós en persoa e eu en espírito, co poder do noso Señor Xesús,

⁵entreguemos a ese tal a Satán: humanamente quedará esnaquizado, pero o seu "espírito" salvarase o Día do Señor.

⁶Non está ben a vosa fachenda. Non sabedes que un pouco de fermento leveda a masa toda?

⁷Purificádevos do vello fermento, para serdes unha masa nova, coma pans ácimos que sodes. Pois o noso año pascual, Cristo, xa foi inmolado.

⁸Fagamos, logo, a festa pero non con fermento vello nin con fermento de malicia e perversidade, senón con pan ácimo de pureza e de verdade.

⁹Escribinvos na outra carta que non vos levarades cos indecentes;

¹⁰pero non me refería ós indecentes deste mundo, así sen máis, nin ós avaros ou ós ladróns ou ós idólatras, porque dese xeito tiñades que saír do mundo.

¹¹O que entón vos escribía foi que non vos levarades con aquel que ostentando o nome de irmán, sexa indecente ou avaro ou idólatra ou faltón ou borracho ou ladrón. Cun home así, nin sentar a comer.

¹²Por que vou xulgar eu os de fóra? Non é os de dentro a quen vós xulgades?

¹³Os de fóra é Deus quen os xulga. Botádeme o perverso do medio de vós.