Read Biblia SEPT 1 Corintios 6 Bible Online

1 Corintios 6 - Biblia SEPT bible

1 Corintios 6

¹Cando algún de vós ten un preito con outro, como é que se atreve a ilo demandar diante dos pagáns e non dos cristiáns?

²Ou é que non sabedes que os cristiáns xulgarán o mundo? E, se vós ides xulgar o mundo, seredes incompetentes para xulgar unhas cousas de nada?

³Non sabedes que xulgaremos os anxos? Canto máis as cousas desta vida!

⁴Pois logo, como é posible que, cando tedes preitos por cousas desta vida, vaiades poñer de xuíces a aqueles que a Igrexa desbota?

⁵Seica non tedes vergonza? Ou é que non hai entre vós ningún home bo que poida facer unha avinza entre irmáns?

⁶Pero, non, van ó preito irmán contra irmán e iso diante dos non crentes.

⁷Desde logo, xa bastante baixeza é que haxa preitos entre vós. Por que non aguantades, máis ben, a inxustiza? Por que non vos deixades, máis ben, roubar?

⁸Pero non, sodes vós os que facedes inxustiza e roubades ós outros; iso que son irmáns!

⁹Non sabedes que os inxustos non herdarán o Reino de Deus? Non vos levedes a engano: nin os indecentes, nin os idólatras, nin os adúlteros, nin os efeminados, nin os homosexuais,

¹⁰nin os ladróns, nin os avaros, nin os borrachos, nin os faltóns, nin os caciques herdarán o Reino de Deus.

¹¹E iso erades algúns de vós. Pero xa vos lavastes, xa vos consagraron e xa quedastes xustificados no nome do Señor Xesús Cristo e no Espírito do noso Deus.

¹²"Todo me está permitido" pero non todo me presta; "todo me está permitido" pero eu non me deixarei dominar por nada.

¹³Os alimentos son para o ventre e o ventre para os alimentos, ademais o Señor destruirá unha cousa e mais a outra. Pero o corpo non é para a fornicación, senón para o Señor; e o Señor é para o corpo.

¹⁴E Deus, que resucitou xa a Cristo, tamén nos ha resucitar a nós polo seu poder.

¹⁵Non sabedes que os vosos corpos son membros de Cristo? E vou coller os membros de Cristo e convertelos en membros dunha prostituta? De ningunha maneira!

¹⁶Ou non sabedes que quen se achegue á prostituta, faise un mesmo corpo con ela? Porque está dito: Faranse os dous unha soa carne.

¹⁷Pola contra, quen se xunta ó Señor, é un mesmo espírito con El.

¹⁸Fuxide da fornicación. Calquera pecado que o home poida cometer, cae fóra do corpo; pero quen fornica peca contra o seu propio corpo.

¹⁹Ou non sabedes que o voso corpo é templo do Espírito Santo que está en vós, porque o recibistes de Deus e que polo tanto non sodes donos de vós?

²⁰Porque, en verdade, compróusevos a bo prezo. Glorificade, por tanto, a Deus co voso corpo.