Read Biblia SEPT Gálatas 5 Bible Online

Gálatas 5 - Biblia SEPT bible

Gálatas 5

¹Cristo liberounos para que vivamos en liberdade. Estádeme, logo, ben firmes nel! Que non vos canguen outra vez o xugo da escravitude!

²E mirade que eu, Paulo, xa vos deixo ben avisados de que, se vos facedes circuncidar, Cristo non vos vai servir de nada.

³E a todo o que se me faga circuncidar, eu vólvolle asegurar que queda obrigado a cumprir coa Lei enteiriña.

⁴Os que procurades na Lei a vosa xustificación, rompestes con Cristo, saístes da graza.

⁵Porque a nós o Espírito móvenos a agardar da fe os bens da xustificación esperada.

⁶Porque en Cristo Xesús estar ou non estar circuncidados non importa para nada: o único que importa é a fe que actúa a través do amor.

⁷Tan ben como iades! Quen vos poñería o pé diante para que xa non obedezades á verdade?

⁸Esta vosa idea non vén, de certo, do que vos chama:

⁹cun chisco de fermento abonda para levedar a masa toda.

¹⁰Mais eu fío no Señor de que vós habedes pensar coma min. Iso si, ese que vos perturba ha levar o seu merecido, sexa quen sexa.

¹¹E eu, meus irmáns, se disque aínda predico a circuncisión, como é que aínda me perseguen? Porque daquela estaría eliminado o escándalo da cruz.

¹²Vaites cos que vos andan a quentar a cabeza! Mágoa que non se castren eles!

¹³Irmáns, a vós chamáronvos á liberdade. Pero coidadiño con servir ós baixos instintos co gallo da liberdade! Habédesme ser escravos uns dos outros mediante o amor.

¹⁴Porque toda a Lei está completa neste precepto: Amarás o teu próximo coma a ti mesmo.

¹⁵Pero, se vos mordedes e devorades, levade tento de non acabardes uns cos outros.

¹⁶Pois quérovos dicir que vivades conforme o Espírito e, que non lles deades polo pé ós proídos do instinto.

¹⁷Porque os baixos instintos cobizan contra o Espírito e o Espírito contra os baixos instintos: contraríanse entre eles tanto, que non facedes o que de verdade queredes.

¹⁸Mais, se vos guiades polo Espírito, xa non estaredes máis baixo a Lei.

¹⁹As obras dos baixos instintos tédelas ben á vista: fornicación, adulterio, libertinaxe,

²⁰idolatría, bruxerías, xenreiras, liortas, cobiza, retesías, discordias, faccións,

²¹envexas, bebedelas, enchentes e cousas polo estilo. Xa vos avisei ben avisados de que non herdarán o Reino de Deus os que tal fagan.

²²En cambio o froito do Espírito é o amor, alegría, paz, paciencia, agarimo, bondade, formalidade,

²³mansedume e dominio de si. Contra isto non hai Lei que valla.

²⁴Os de Cristo Xesús crucificaron os baixos instintos coas súas paixóns e cobizas.

²⁵Se vivimos no Espírito, sigamos coma norma o Espírito.

²⁶Non hai que ser farfalláns. Non se hai que encirrar uns cos outros. Non nos temos que envexar.