Read Biblia SEPT Gálatas 6 Bible Online

Gálatas 6 - Biblia SEPT bible

Gálatas 6

¹Irmáns, se acaso colledes a alguén nunha falta, vós, coma homes do Espírito, reprendédeo polas boas, termando cada quen de si, que ti tamén podes ser tentado.

²Levade uns as cargas dos outros, que así cumpriredes coa Lei de Cristo.

³O que, así polas boas, coida que é algo, non sendo nada, a quen engana é a si mesmo.

⁴Bote contas cadaquén sobre os propios feitos, e daquela terá en si e non nos outros razón para estar satisfeito.

⁵Cadaquén ten que levar o seu fardel.

⁶Cando un vaia á doutrina onda outro, faga parceiro dos seus bens ó que lla ensina.

⁷Non vos levedes a engano, que de Deus non hai quen faga riso. Conforme sementes, recollerás.

⁸O que semente baixos instintos dos baixos instintos recollerá podremia; e o que semente no Espírito, do Espírito recollerá Vida eterna.

⁹Non cansemos de facer o ben, que, coma esmorecer non esmorezamos, cumprido o tempo habemos ter boa colleita.

¹⁰Polo tanto, fagamos ben a todos, mentres temos tempo, maiormente ós nosos irmáns na fe.

¹¹Mirade con que letras tan grandes vos escribo eu pola miña man.

¹²Os que queren quedar ben vistos no externo, son xustamente os que vos queren facer circuncidar, para que non os persigan a eles pola cruz de Cristo.

¹³Pero se nin tan sequera os que circuncidan cumpren coa Lei! O que queren é que vos circuncidedes vós para se gabaren da vosa circuncisión.

¹⁴Pero a min Deus me libre de gabarme en algo que non sexa a cruz de Cristo, na que o mundo está crucificado para min como eu para o mundo.

¹⁵Pois tanto ten estar circuncidado coma estar sen circuncidar. O que importa é a nova creación.

¹⁶A paz e mais a misericordia virán sobre todos os que se axusten a esta norma e sobre o Israel de Deus.

¹⁷De hoxe en diante que ninguén me veña amolar, porque levo no meu corpo as marcas de Xesús.

¹⁸Irmáns, que a graza do noso señor Xesús Cristo vaia convosco. Amén.