Read Biblia SEPT Efesios 2 Bible Online

Efesios 2 - Biblia SEPT bible

Efesios 2

¹E tamén vós estabades mortos polos vosos delitos e pecados

²e neles camiñabades daquela seguindo os criterios deste mundo e seguindo ó príncipe do poder do aire, do espírito que agora actúa nos fillos desobedientes...

³Entre eles viviamos daquela tamén todos nós, satisfacendo os nosos baixos instintos, cumprindo os baixos desexos e os caprichos dos instintos, sendo naturalmente fillos da ira, coma os mais.

⁴Pero Deus, que é farturento en misericordia, polo grande amor que nos amosou

⁵cando estabamos nós mortos polos nosos pecados, fíxonos revivir con Cristo (salváronvos por pura benquerenza) e

⁶resucitounos con El e con El fíxonos sentar no ceo en Cristo Xesús,

⁷para mostrarlles ós séculos vindeiros a desbordante riqueza da súa graza, manifesta na bondade que tivo connosco en Cristo Xesús.

⁸Porque vos salvaron por graza, mediante a fe; e isto non vén de vós: é don de Deus;

⁹e non vén das obras, para que ninguén se dea méritos.

¹⁰Somos, logo, feitura del, creados en Cristo Xesús para facermos o ben no que Deus dispuxo de antemán que camiñemos.

¹¹Por iso debedes lembrar que vós, os que hai algún tempo erades xentís no corpo tratados de incircuncisos polos da chamada circuncisión (pura obra humana no corpo),

¹²estabades daquela sen Cristo, excluídos da cidadanía de Israel e alleos ás alianzas da promesa: viviades sen esperanza e sen Deus, no mundo.

¹³Pero vós, que antes estabades lonxe, agora grazas a Cristo Xesús estades cerca, no sangue de Cristo.

¹⁴El é a nosa paz: o que dos dous pobos fixo un só, derrubando a medianeira divisoria a inimizade, e abolindo na súa carne

¹⁵Aquela Lei de mandamentos e normas, para crear en si mesmo cos dous unha nova humanidade, facendo a paz;

¹⁶e reconciliando con Deus ámbolos dous nun único corpo por medio da cruz, matando nel mesmo a inimizade.

¹⁷El veu e anunciou a paz: paz para vós os de lonxe, e paz para os que estaban cerca:

¹⁸porque por el temos uns e outros acceso ó Pai, nun mesmo Espírito.

¹⁹Por tanto, xa non sodes estranxeiros nin xente de fóra: sodes concidadáns dos crentes e membros da casa de Deus,

²⁰edificados sobre o alicerce dos apóstolos e dos profetas, sendo a pedra esquinal Cristo Xesús.

²¹Sobre el toda a construción se vai erguendo ata formar un templo santo no Señor.

²²E nesa construción tamén entrades vós, para formardes unha morada de Deus, no Espírito.