Read Biblia SEPT Efesios 5 Bible Online

Efesios 5 - Biblia SEPT bible

Efesios 5

¹Facédevos, logo, imitadores de Deus, coma fillos queridos,

²e camiñade no amor, igual ca Cristo, que vos amou e que se entregou por nós coma ofrenda e vítima a Deus de recendo agradable.

³De inmoralidades ou de cobizas que nin sequera se fale entre vós, como corresponde a cristiáns.

⁴Nin haxa tampouco groserías, estupideces ou choqueiradas: son cousas que non proceden. En vez diso dádelle grazas a Deus.

⁵Tede por certo que quen se dea á prostitución, á inmoralidade ou á cobiza (que é unha idolatría) non herdará o Reino de Cristo e de Deus.

⁶Que ninguén vos engaiole con palabras baleiras, que por estas cousas vén a ira de Deus sobre os fillos rebeldes.

⁷Non vos fagades cómplices delas;

⁸porque antes, si, erades tebras pero agora sodes luz no Señor. Así que andade coma fillos da luz,

⁹(porque a luz é toda bondade, xustiza e verdade),

¹⁰tendo en conta o que agrada ó Señor.

¹¹E non compartades as obras estériles das tebras; polo contrario, denunciádeas,

¹²que do realizado por eses tales ás agachadas dá vergonza mesmo falar.

¹³Pero todo iso, cando o delata a luz, queda ó descuberto,

¹⁴pois todo o que se manifesta é luz. Por iso dise: Acorda, ti que estás a durmir, érguete do medio dos mortos e Cristo iluminarate.

¹⁵Mirade, logo, con tino como camiñades: non coma atolados senón coma sensatos,

¹⁶Aproveitando ben este tempo, que corren días malos.

¹⁷Por iso, non sexades irreflexivos; ó contrario, tratade de comprender cal é a vontade do Señor.

¹⁸Non vos emborrachedes con viño, que leva á libertinaxe; en vez diso enchédevos de Espírito,

¹⁹falando entre vós con salmos, himnos e cánticos espirituais, cantando e salmodiando con toda a alma para o Señor

²⁰e dándolle grazas decote a Deus Pai, por todo, no nome do noso Señor Xesús Cristo.

²¹Sede ben guiados uns cos outros por respecto a Cristo:

²²As mulleres sométanse ós propios maridos, coma se fose o Señor,

²³pois o marido é cabeza da muller, coma tamén Cristo é cabeza da Igrexa, o salvador do corpo.

²⁴E, coma a Igrexa se somete a Cristo, así tamén as mulleres ós seus maridos, en todo.

²⁵Homes, amade as vosas mulleres, coma tamén Cristo amou a Igrexa e se entregou por ela

²⁶para santificala, purificándoa co baño de auga na palabra,

²⁷e para presentala deste xeito diante de si, radiante, sen lixo nin engurra nin cousa polo estilo senón santa e inmaculada.

²⁸Así deben tamén os maridos amar as súas mulleres coma os seus propios corpos. Quen ama a súa muller, ámase a si mesmo,

²⁹porque ninguén odiou endexamais a súa propia carne senón que a mantén e aquece, como fai Cristo coa Igrexa,

³⁰porque somos membros do seu corpo.

³¹Por iso deixará o home a seu pai e mais a súa nai e unirase á súa muller e serán os dous un único ser.

³²Grande misterio é este e eu refíroo a Cristo e á Igrexa.

³³En calquera caso, todos e cada un de vós, debe amar a súa muller coma a si mesmo; e a muller, que respecte ó seu marido.